Bisyo ug damgo ni Davide

Sama ni Presidente Noynoy Aquino, si Cebu Governor-elect Junjun Davide di makabiya sa iyang bisyo sa pagpanigarilyo. Kasagaran makahurot siya og usa ka kaha. Tungod sa kahigpit sa iyang kalihokan ug kadaghan sa mga dapit nga kinahanglan niyang duawon, mas daghang sigarilyo ang iyang nahurot sa niaging kampanya.

Sama ni Aquino, nahiagom na si Davide sa ubo nga naandan sa mga manigarilyo. Apan wa siya’y plano nga mohunong inig lingkod niya sa Kapitolyo sa udtong tutok karong Hunyo 30. Niangkon siyang mas motin-aw ang panghunahuna kun manigarilyo. Way nagsige og gahot ni Davide pagbiya sa bisyo kay manigarilyo sab ang iyang asawang si Jobel.

* * *

Laing bisyo nga gikumpisal ni Davide mao ang pag-inom og ginagmay’ng bino. Kasagaran uban ni Jobel ug sa ilang suod nga mga higala, labi na kun may espesyal nga mga okasyon.

Way labot ang mga magbubuhis sa mga bisyo sa gipili nilang mga opisyal. Gawas lang kun makaapektar na sa pagtuman sa ilang mga gimbuhaton. Ang pagpanigarilyo ug ubang bisyo ni Aquino, sama sa padayong pagpangita og mapangasawa, wa makaiban sa iyang kakugi ug kaligdong. Mga nasuhito ni Davide nipasalig nako nga wa pa sila sukad masukad makakita niya ug ubang mga sakop sa iyang pamilya nga nagsusapinday sa kahubog. Labi na sa gahom.

* * *

Wa kakita si Davide sa panginahanglan pagpadako ug pagpabug-at sa iyang tingog sa mosunod nga tulo ka tuig nga pagduma sa Kapitolyo sa Sugbo. Masaligon siya nga ang mga ikauban sa pangalagad di kinahanglang singkahan ni labayon og mga butang aron motuman sa iyang mga tahas.

Pipila ka opisyal sa Liberal Party nanghinaot nga ihikling ni Davide ang iyang kamaikugon ug huptan ang mas agresibong personalidad aron pagkumbinser sa mga botante nga takos siyang pangu sa Sugbo. Apan gidawat sa mga Sugbuanon si Davide nga hawa sa pagpaka aron ingnon. Kinsa nakapahimus sa usa sa benepisyo sa kalumo sa tingog--wa mapagaw bisan sa taas ug kutas nga kampanya.

* * *

Andam na si Davide nga mag-gobernador sa Sugbo sud sa 24 oras matag adlaw ug pito ka adlaw matag semana. Dagko nang tulo nila ka anak nga pulos babaye ug pulos tua na sa kaulohan. Sila na lang duha si Jobel ang kasagarang magtikaw-tikaw sa ilang panimay sa Sugbo. Busa makatingob na sa iyang panahon pagpangamahan sa tibuok probinsiya.

Dakong hagit ni Davide ang pagtuman sa iyang gisaad nga pagbadlong sa anomalusong mga proyekto ug pagtarung sa hiwi nga pamunoan sa Kapitolyo. Iyang damgo ang paghatag sa matag Sugbuanon, bisan unsa kayano ug kakabos, og managsamang kahigayonan pagpalambo sa ilang pagpuyo.

(Makita nimong kinatibuk-an namong pakighinabi ni Davide atol sa Tubag! sa ABS-CBN Channel 3 dayong alas-7 sa buntag karong Sabado, Mayo 18.)

* * *

Email: [email protected]