Ikaunom nga hilisgutan: Mga Pahimangno Gikan sa Rituale Romanum

Ania ang mga mahinungdanong kamandoan sa Roman Ritual kanila nga mohimo ning maong tahas o buluhaton. Atong gihimo ang paghubad ug paghimo niini nga yano aron mas masabtan sa bumabasa.

1. Ang si bisan kinsang pari nga mohimo sa ritwal ang magkinahanglan og usa ka dayag nga pagtugot gikan sa iyang Obispo  sanglit, ang solemneng eksorsismo ang gibuhat man ubos sa landong sa panalipod ug gahom sa simbahan. Busa angayan lamang nga kini pagatugotan sa simbahan pinaagi sa pormal nga paghatag sa pagtugot o faculty ingon man sa pagtugot usab sa biktima ug sa iyang pamilya.

2. Dugang pa, ang pari nga natahasan, kinahanglang pari nga maampoon, ug nahimong ehemplo o modelo sa usa ka matarong nga kinabuhi.

3. Dili maayo nga ihatag dayon ang hinanaling mga hukom nga ang usa ka tawo hingyawaan o nasudlan. Hinunoa, pagahimoon gyud ang usa ka makuting pag-imbestigar niini. (tan-awa ang mga timailhan nga atong nahisgutan sa unahan).

4. Sa matag human sa Ritwal sa Eksorsismo, ang biktima kinahanglang pangutan-on sa eksorsista sa mga nasinati niini o mga reaksiyon niya sa matag higayon nga pagahimoon ang ritwal.

5. Kinahanglang maantigong mosabot ug mamalandong ang eksorsista sa mga tubag o mga gipadayag sa yawa. Kini tungod kay ang yawa, bakakon ug malimbungon sukad pa sa sinugdan. Tuyoon niya nga libogon ang eksorsista aron sa ingon kini moundang gumikan sa kakapoy ug mawad-an sa paglaom.

6. Human mailhi ang yawa o mga yawa nga anaa sa biktima, sila motago o mobiya sa lawas sa biktima. Apan gikinahanglan nga dili molunga ang eksorsista ingon man ang iyang mga kaubanan hangtud matataw na gyud ang mga tinuod nga timailhan sa kalingkawasan.

7. Ang yawa ang mohimo gyud og mga babag sa eksorsista sa paghimo sa ritwal sa eksorsismo.

8. Pagadid-an ang biktima nga moduol o mangayo og tabang sa mga manalagna, tambalan, o diwatahan. Hinunoa, kinahanglang duolon lamang niya ang mga ministro sa simbahan nga natahasan sa maong buhat.

9. Magmabinantayon ang eksorsista nga dili siya mabutang sa laang sa dautan. Kini tungod kay ang yawa mahimong mobiya sa makadiyot ug gani, tugotan ang biktima nga makakalawat sa Sagrada Eyukaristiya.

10. Pag-Ampo ug Puasa. Kini ang duha ka mga mahinungdanong balansayon nga pagahimoon sa eksorsista. -- Sumpayan pa