Ang pagdaug sa problema

Ang problema o suliran, mao kanay timailhan nga kita may kinabuhi pa. Sa ato pa, dili ta makalikay niini. Kun sa unsang paagi nga naninguha ta nga mabuhi, ayaw gyud isalindot ang pagpakabana nga permi kita nakaandam aron dili ta maalaut sa mga problema, nga dili damhong kalit mobutho sa atong kinabuhi.

Sagad mahitabo ,basta moabot ang suliran atoa man gud pugson nga pas-anon ang kalibutan maong mabug-atan. Malukapa hangtud mawa ang paglaum. Nataranta kay wa mabansay sa pakigbisog. Dili baya lalim ang pagbuntog niani, busa nagkinahanglan kag enerhiya o kusog aron ka modaug sa mga problema.

Simple ra kaayo ang buhaton mo. Ayaw lang kalimot nga ang problema maoy imong dad-on ug dili kay ikaw na noon ang dad-on sa problema. Likaye ang pagpas-an aron di ka mabug-atan. Imo lang aninawon ug suhiron diha sa alimpatakan mo, hangtud mahashasan mo nga makab-ot ang tukmang sulbad.

Ang pagsalig sa Dios, dako kaayo ang matabang. Importante sad nga anaa sa kahimsog ang utok ug panglawas mo, aron ikatigi nga molahutay sa pagdaug. Isipa ang problema nga usa ka hagit sa pagsulay sa imong kalamposan. Ayaw katalaw sa kapakyasan. Kinahanglan positibo ka nga maisogon sa pagsulbad.

Ipabati o ipahungaw sa mga kasaligan mo aron ikaw matabangan. Dili mo ugtason ang isip ug kasingkasing mo aron paglikay sa laing suliran. Maglingaw-lingaw samtang magduhiraw sa kasulbaran. Makighinabi sa may mga kasinatian sa pamasin may makutlo kang paagi o ideya. Ayaw kaikog patambag sa uban.

Iliraw sab ang panan-aw sa palibot basig may masigpatan kang nagpahipi nga kakuhaan mo sa paglaum. Aron pagseguro sa imong disisyon, maghimo kag panig-ingnan o leksyon. Kun may nakita ka pang kakulangan, han-aya ug ayaga pag-ayo hangtud nga mohaom sa pagtuo mo nga kini maoy sulbad nga buhaton.

Angay natong mahinumduman, nga kutas kaayo ang daghang lakang nga atong lakton ang kapakyasan. Kay kini man ang giya nga gilatid sa kinaiyahan. Nga kun buot kang moangkon sa imong tinguha ning kinabuhia, mopadayon kang madasigon. Hangtud mahiabot ka sa usa ka lakang alang sa kalamposan.

Busa kun kini ang atong himoon nga istilo sa kinabuhi, dili na ta nerbyoson, motaas ang kompyansa nato nga makigharong sa unsa mang gumonhap, nga di kalikayan moabot gyud samtang may kinabuhi nga gipahulaman pa kanato.