Senior Citizen

Dili bitaw tukma nga tagalan lang og 15 ka adlaw ang mga senior citizens pagkobra sa ilang cash assistance gikan sa dakbayan sa Sugbo ug kun molapas dili na ihatag kanila.

Mao kini ang rason nga sa kapin sa 54,000 ka senior nga rehistrado sa Office of Senior Citizens Affairs (OSCA) sa dakbayan sa Sugbo, ang dul-an sa 2,500 kanila wala makakobra.

Posible man nga ang maong mga senior mibisita sa ilang mga anak o kaha apo didto sa lagyo nga mga dapit ug wala na sila makahigayon pagpauli dayon.

Dili tingali maayo nga dali-dalion nato sa pag-forfeit ang ilang benepisyo abi kay wala makakobra sulod sa 15 ka adlaw gikan sa pag-release sa maong cash assistance.

Pabor ko nga ang maong mga benepisyo adto na i-forfeit kun dili makobra lapas sa Disyembre 31. Hinoon, kun mamatay tingali ang senior, mahimong lahi na ang sitwasyon.

Apan dakung pagpahimulos ang gihimo niadtong mga senior nga motuyo lang gayud pagbalhin pagparehestro dinhi sa dakbayan aron nga makakuha sila og cash assistance.

Tiaw, dunay uban nga tua na unta magpuyo sa lagyo nga dapit apan moari g’yud sa dakbayan ug mopatoo nga anaa magpuyo sa balay sa ilang mga anak.

Human nila og kobra sa ilang cash assistance, ang senior mobalik na usab sa dapit nga tua g’yud sila magpuyo. Mao kini ang rason ngano nga daghan ang wala makakobra sa ilang benepisyo.

* * *

Misaka ang koleksyon sa CITOM sa miaging buwan gikan sa smoke belching campaign, ilabi na sa mga trak de-karga ug mga passenger jeep.

Mikolekta ang CITOM og P14,000 kun itandi sa ilang koleksyon sa buwan sa Disyembre nga miabot lang og P3,700. Tan-aw nako, palpak gihapon ang kampanya sa Anti-Smoke Belching Team sa mga sakyanan nga magbuga og itum nga aso.

Kanunay g’yud ko nga makakita og sakyanan, kadaghanan mga PUJ nga magbuga og itom kaayo nga aso sa iyang tambutso. Kini maoy rason nga dili na kaayo ko ganahan nga mogamit sa akong motorsiklo.

Ang dakbayan sa Sugbo dunay ordinansa nga mosilot sa tag-iya og mga sakyanan nga magbuga og itom nga aso, apan paminaw ko nga kuwang pa g’yud ang pagpatuman.

Kinahanglan tingali nga kadtong masakpan nga nagbuga og itom nga aso, tangtangan g’yud sa plate numbers ug kun masakpan pag-usab nga gipadagan gihapon nga wala ayoha, dunay silot nga ipahamtang sa tag-iya.

Daghang mga tag-iya og mga PUJ nga maayo lang modawat sa kita sa ilang sakyanan apan dili makamao mopaayo.