Bata nga wa ipaagi sa legal adoption aduna bay katungod nga mo-inherit!

Daghan sa mga magtiayon nga dili makaanak ang nakahuna-huna sa pagsagop og bata apan tungod kay mahal og taas ang proseso sa legal adoption kadaghanan kanila moresulta na lang sa birth simulation o pag-falsify sa birth records sa bata nga diin sila ang mogawas nga mga biological parents niini. Apan ang dakong pangutana kun unsay mamahimong epekto niini sa bata ilabi na ang iyang katungod sa pag-inherit? Kana nga pangutana ang atong tukion karon.

* * *

“Dear Atty. Divine,

Have nice day Atty. Sukad nakabasa ko sa imong Tambag Tubag sa Banat news, nagsige na ko og atang sa adlaw sa imong schedule. Gani ako gipangcut-out ug gi file ang imong mga lindog.  Atty. duna koy igsoon lalaki (patay na), wala’y anak apan dunay sinagop (walay adoption papers), pero nay birth certificate nga sila ang parents. Tanang tawo sa among lugar ug ako mismo nakahibalo nga sinagop ra nila ang ilang giisip nga anak. Dunay 2 ka luna sa yuta ang among igsuon nga kabilin sa among ginikanan isip iyang bahin, ang usa niini pagatungaon nila sa akong igsoon nga babaye (patay na) ug dunay 6 ka buok anak, ug ang usa ka luna iya ra jud. Pero ang mga anak sa among igsoon wala gayud bahini sa abot sa yuta kay ang sinagop may magbuot. Buot ibaligya sa sinagop ang usa ka luna nga tungaonon ug iya ang katunga sa halin ug ang katunga adto sa mga managsoon. Ug ang usa ka luna iya pud ibaligya, iya tanan ang halin kay gulang na man ang silbi niya mama.

Akong pangutana Atty: Puede ba diay makabuot-buot ang sinagop og baligya?Insakto ba siya ? Unsa may among buhaton ani nga dili man ni siya namo kadugo? Hinaut imo kong malamdagan bahin ani para sa akong mga pag-umangkon nga tinood jud nga mga apo sa among mga ginikanan nga maoy original nga tag-iya sa yuta.

— Ver

* * *

Dear Ver,

Salamat sa imong pagsunod sa Legal Corner sa Banat News. Kun kanang bataa wa masagop legally sa imong igsuon wa unta siyay katungod nga mosunod o mo-inherit sa kabilin o kabtangan sa imong igsuon, apan ang problema lang kay sa iyang birth certificate ang imong igsuon ug ang iyang asawa maoy nabutang niini nga inahan ug amahan sa bata, sa ato pa dunay nahitabo nga simulation of birth ug pag-falsify sa iyang birth records nga diin ang imong igsuon bisan dili maoy biological father maoy nabutang nga amahan sa iyang birth certificate ug kini usa ka kalapasan sa balaod ubos sa Article 347 sa Revised Penal Code ug sa Section 21 (b) sa Domestic Adoption Act. Kining maong birth certificate maoy iyang gibasihan sa pagsunod sa kabtangan sa imong igsuon ug ang inyong problema karon kay siya na ang nagbuot sa tanan lakip na sa pagbaligya sa property. Isip dili legal nga sinagop wa siyay katungod nga magbuot-buot o mo-inherit sa property sa imong igsuon kay di man siya kadugo. Busa ang una ninyong buhaton karon mao ang pagpadangat og reklamo batok kaniya ngadto sa barangay nga iyang gipuy-an tungod kay wa niya bahini ang inyong usa ka igsuon sa income sa maong yuta ug ikaduha ninyong ireklamo kanang dili niya tinuod nga anak. Mas maayo nga mag-atubang mo sa barangay aron inyong matuki ang inyong problema. Kun ugaling di gyud mo mahusay sa barangay mamahimo mong modangop sa Korte ug inyong probahan nga dili siya matuod nga anak sa imong igsuon busa wa siyay katungod nga mo-inherit sa iyang mga kabtangan. Hinaut nga akong natubag ang imong pangutana. — Atty. Divine

Alang sa inyong pangutana, ipadala lang sa Legal Corner sa Banat News or email sa [email protected].