Pagkuwang sa Korte Suprema
Nisiak ang kahilom sa Palace of Justice dinhi sa Sugbo dihang usa ka langyaw nga nawad-an na og paglaum sa atong judicial system ang kalit nga namusil sulod sa korte niadtong Martes sa buntag. Patay diha-diha si Dr. Rene Rafols ug ang abogado niini nga si Atty. Jubian Achas samtang naangol ug pabiling talandogon ang kahimtang sa piskal nga si Ma. Theresa Casino sulod sa Chong Hua Hospital.
Ang langyaw nga si John Pope, usa ka Canadian, namatay sab atol sa maong hitabo apan dili pa matino hangtud nga ma-autopsy ang iyang lawas kun kinsay nakapatay niya. Dunay report nga napusilan siya sa duha ka polis ug duna say taho nga nag-unay siya og pusil sa iyang kaugalingon.
Hangtud nga mahimo ang autopsy, diin gipaabot nga malangan pa tungod kay gihuwat pa ang pamilya ni Pope nga moabot karong Sabado sa hapon, dili pa gyud matino kun naghikog o napatay ang langyaw.
Apan usa ka butang ang tataw, dunay sipyat sa pagpatuman sa siguridad diha sa Palace of Justice. Daghan ang mga pangutana nga hangtud ron way klarong tubag. Una, giunsa pagsulod sa mga armas sa langyaw? Wala ba diay mohimo og pagpangrikisa ang gwardiya sa mga tawo nga misulod sa korte? Kun girikisa man, sigun sa pangangkon sa gwardiya, diin man tago-i ni Pope ang iyang armas?
Pipila lang ni sa daghan kaayong mga pangutana human sa hitabo. Ang siguridad sa korte direkta nga obligasyon sa Korte Suprema. Kini maoy hinungdan nga ang taas nga hukmanan dunay gisweldohan nga mga security guards pagbantay sa korte.
Apan unsaon man sa gwardiya ang pagsiguro nga luwas ang mga korte sa nasud kun sila kuwang sa mga kahimanan? Ang tinuod usa sa mabasol sa lugak nga siguridad sa Palace of Justice dili lang kay ang mga gwardiya nga ilang sinuholan kun dili ang mga opisyal sa korte mismo.
Sayop sa mga opisyal sa korte nga wala siguroa nga kumpleto sa mga kahimanan alang sa siguridad ang atong mga korte. Sama sa paghatag og mga metal detector sa mga gwardiya o ba kaha pag-install og metal detector sa ganghaan sa Palace of Justice.
Laing kakuwangan mao ang pagbutang og mga CCTV camera palibot sa korte. Posible man gud nga didto ipalusot ni Pope ang armas sa bintana hinungdan nga wala kini mabantayi sa gwardiya.
Kun duna pay CCTV posible nga nakit-an kun duna may mga ingon niini nga sitwasyon.
* * *
Human sa hitabo, nabanhaw na sab ang panawagan nga tugotan nga magbaton og armas ang mga piskal ug mga abogado. Alang nako wala kinahanglana ang maong panawagan tungod kay wala man did-i ang mga piskal ug abogado nga maghupot og armas.
Gani si bisan kinsa nga responsabli nga molupyo ning nasud makahimo man pagtinil og armas. Apan kinahanglang mosubay sa hustong proseso.
Ang tinuod nga isyu dili ang pagbaton og armas sa mga piskal ug mga abogado kun dili ang siguridad sa atong korte. Kun lig-on pa lang unta ang siguridad sa korte nalikayan unta nga makasulod si Pope nga dunay dala nga armas.
Samtang dili garantiya ang kalig-on sa siguridad sa korte nga dili niya himuon ang krimin sa laing dapit. Apan wala unta mabutang sa dakong kauwawan ang judiciary sa nasud.
* * *
- Latest
- Trending
