Bililhong Gasa

Dili lang kay knockout ang nadawat sa Romano Katoliko nga simbahan, kun dili pagbasol usab sa mga magtutuo, niining pagkapasar sa Reproductive Health bill sa Kongreso.

Human mapilde sa kampanya batok sa RH bill, gibasol ang kaparian ug ka-obispohan sa pagkatibulaag sa mga tawo. Ug nga ang pag-wali nila sa moralidad, sumala pa sa mga pro-RH, wala na mahiuyon sa moralidad nga gituohan sa kinabag-an.

Naunsa na hinuon ni?

Ning panahona, ang matag usa aduna nay iyang pagtuo unsa ang pulong moral ug unsa ang imoral. Mao ba kini ang rason nga wala na kita magkinahanglan sa mga pari?

Didto sa Estados Unidos ug sa ubang nasud, sama sa China, kining pulong moral makit-an lamang sa lapa-lapa sa tawo. Nga kun gusto nimong tan-awon, kinahanglang motuwad ka. Akong pasabot nga lisod na pagpangita sa maong pulong sa tagsatagsa nila didto.

Sa Amerika, bisan bata pa mahimo nang mag-biga-biga. Sa China, ang mga bag-ong gi-anak nga makitang walay silbe, mahimong patyon tungod sa one-child policy.

Sa ilang mga tunghaan, hugot ang pagtudlo sa palisiya sa gobyerno, apan kulang sa pagpasabot sa moral values.

Ang resulta, sayon bisan sa usa ka batan-on ang pag-massacre sa mga tinun-an sa tunghaan, sa mga tawong nanuroy sa mall ug sa mga nanan-aw og salida sa sine.

Kitang mga Pilipino mura'g anaa mopaingon niining sitwasyona kun gusto nato nga kitang tanan adunay tagsatagsa ka meaning sa pulong moralidad. Ug nga ang pagpasabot sa mga pari kalabot niini wala na nato kinahanglana.

Karon nga napasar na ang RH bill, unsay laing imoral nga balaodnon ang mosunod?

* * *

Unsa man kasuod kining gihinganlan og Randy Bulibuli sa barangay Pasil sa hepe sa San Nicolas Police Station nga si Chief Insp. Noel Lomente nga wala man kini kabuhati og raid sa iyang nga sakop?

Ang grupo sa Regional Special Operations Group mironda sa balay ni Bulibuli sa Pasil ug miresulta sa pagkadakop sa 32 ka mga coordinator sa sugal nga Suertres.

Si Bulibuli dugaydugay na diay'ng gibantayan sa kapolisan, apan wala gyud gukora ni Lomente. Kun wala pa rondaha ang iyang balay ug si Bulibuli milayat sa iyang koral, dili mahibaw-an ang operasyon sa Suertres sa Pasil nga mikatap sa kasilinganang barangay.

Apan ang akong nahibudngan, nganong hangtod karon nagpabilin pa man si Lomente sa San Nicolas bisan sa estrikto nga one-strike policy sa PNP?