Delicadeza ni Bebot

Nahimutang sa alanganin si Konsehal Bebot Abellanosa ning paglutaw sa reklamo nganong ang tunghaan nga iyang gipanag-iya nahimong usa sa nakabenepisyo sa scholarship program sa kagamhanan sa siyudad sa Sugbo.

Gatusan ka mga tinun-an sa Asian College of Technology ang benepisyaryo sa scholarship program sa Cebu City Government.

Giangkon na kini sa konsehal. Hinuon, kining maong transaksiyon nalili-an kini sa mga kauban niyang mga konsehal tungod kay miagi man kini og legislative scrutiny sa konseho sa dakbayan sa Sugbo.

Sa ato pa, nag-agi kini sa legal nga proseso ug ang pagkalambigit sa ACT sa kontrobersiya nahitabo tungod kay ang mga tinun-an anaa man magtungha dinha nianang maong tunghaan.

Apan para nako, gawas nianang legal nga proseso, maayo usab unta lili-on ni Konsehal Bebot ang “delicadeza”. Ang maayong pamatasan ug kaulaw nga moapil sa deliberasyon mentras ang tunghaan nga iyang gipanag-iya maapil sa mabulahan sa scholarship program.

Utokan si Konsehal Bebot. Nangangkon man gani kini nga nakagradwar sa Harvard University. Busa nakasabot siya unsay delicadeza. Alang sa mga wala makatugkad unsa kining maong pulong, ang pulong delicadeza usa ka pinulongang kinatsila nga ang meaning sa pinulongang English “an act of being refined or delicate in tastes or manners.”

Sa ato pa, maayong pamatasan.

Mahimong maikyasan ni Konsehal Bebot ang tulisok sa iyang pamatasan kun iyang gi-“divest” ang iyang kapanag-iyahan sa tunghaan nga mahimong makabenepisyo sa programa nga gituki, gipasar ug gipatuman pinaagi sa balaod nga gipasar sa lehislatura nga usa siya sa naglingkod ug mipasar sa samang balaod; o ba kaha, wala siya manginlabot sa diskusyon (abstain) sa proceedings.

Gibuhat ba kini ni Bebot?

Kining isyu sa scholarship program modagan pa kini hangtod sa kampanya tungod kay nakaseguro ko nga naghinamhinam na ang kampo ni Totol Batuhan pagtuki niini sa entablado aron kuwestiyonon ang maayong pamatasan ni Bebot.

Gawas kun makahimo og maayong depensa si Bebot, kining isyuha posibleng modulot sa iyang tanlag hangtod sa adlaw sa eleksiyon.