Nganong napildi?

Mora sad kong na-KO dihang napilde si Manny Pacquiao by way of knockout. Wa kong makatug. Pero naay daghan kong kaila nga wa mahibong sa kapildihan ni Manny.

* * *

Kadaghanan mipasangil sa grabeng kapildihan ni Manny sa relihiyon. Sa iyang pagbalhin og laing tinuohan. Ako naminaw lang sa ilang pamasangil.

* * *

Ang amigo tang si magsusulat Javier Y. Tapulado bisan sa wa pa ang boksing misulti na sa usa ka artikulo nga iyahang gisulat alang sa Banat News nga napanan-awan na niya ang kapildihan ni Manny.

* * *

Ang pagbalhin og relihiyon ni Manny maoy gibasihan ni Javy sa iyang prediksyon. Wa na kunoy pupanguros si Pacman. Giitsa puwersa na ang rosaryohan nga kaniadto kanunay magbitay sa iyang liog.

* * *

Mao say pasangil ni Paolo Sanchez, higala sab nato nga gusto sang ilhon nga periodista kay matud niya himasa siya og periodiko. Matud ni Paolo: “Sukad sa pagka-born again ni Manny dili na siya manguros ug wa na motuo sa power sa rosaryo. Busa tan-awa nangamote siya.”

* * *

Si Mrs. Felina Achumbre misulti: “Nakaila na tingali ron si Manny sa resulta sa wala na niya paggamit sa iyang kamot sa pagpanguros sa dayon na niyang away sa ring.”

* * *

Naobserbahan ni Noy Ramon Tablas nga taga Punta Princesa nga si Marquez maoy nagpanguros dihang misugod na ang away. “Ang maong kamot nga iyang gigamit panguros maoy naka tumba ni Manny duha ka higayon,” matud niya.

* * *

Naay mga nag-ingon “Mirese ka Manny” ug “dili kahibudngan ang kapildihan ni  Manny.”