Ang implikasyon ni Obispo Teofilo Bastida Camomot sa atong kinabuhi
TUMONG: Ang tinguha sa pagpahigmata nga ang pagkabalaan tawag natong tanan.
6. Ang mga buhat sa kaluoy. Si Obispo Teofilo usa ka tawo nga manggihatagon ug dili niya buot nga mapakyas ang si bisan kinsa nga moduol kaniya panahon sa kalisdanan ug panginahanglan. Kini usab ang nagdapit kanato nga bisan pa man sa atong kalisud ug sa atong pagkawalay ato maantigo gihapon kitang mopaambit uban ang gugma ug kalipay. Ang Katesismo sa Pilipinong Bisaya nagkanayon:” Ang labi pa gyung mahinungdanon mao ang pagladlad sa mga buhat sa kaluoy ngadto sa halapad nga natad sa katilingban ug politika alang sa pag-alagad sa uban. Si Obispo Teofilo ang dili magsapayan nga walay mabilin bisan sentimo sa iyang bulsa. Andam siyang mohatag sa tanan nga anaa kaniya ug andam siyang magsakripisyo alang sa uban. Ang tanan giisip niya nga iyang igsuon. Nga bisan pa man sa mga higayon nga siya gibinuangan apan wala siya makigbatok, hinunoa iyang gitugbangan ang bisan unsang dautan ug maayo. Mao nga usa siya ka batid diha sa mga buhat sa kaluoy kay maayo man ang iyang pagtan-aw ug panglantaw sa kalibutan ug sa katawhan. Haom si Obispo Teofilo sa giingon ni Pablo Apostol: “Ayaw padaog sa dautan, hinuon dag-a ang dautan pinaagi sa maayo.”