Lili-on ang bank accounts nilang Gwen, Pablo John

Walay laing ebidensiya sa pagkalimpyo diha sa panerbisyo gawas sa gipublikar nga kabtangan.

Ang mga Sugboanon motuo lamang nga mimis ug limpyo ang panerbisyo nilang Gobernadora Gwendolyn Garcia ug Kongresista Pablo John Garcia sa ikatulong distrito sa lalawigan sa Sugbo kun mapamatud-an nila nga wala motubo sa milagrosong pamaagi ang ilang bahandi.

Kun tinuod nga “pure” serbisyo ang ilaha ni Gwen ug Pablo John ug wala sila mag-apas sa salapi nga makuha pinaagi sa gahum, dili sila angayan mahadlok sa bahad ni kanhi Konsehal Hilario “Junjun” Davide III nga lili-on ang ilang mga bank accounts.

Sila pa ni Gwen ug Pablo John ang mag-una-una sa pagpresentar ngadto sa publiko sa listahan sa ilang bahandi kaniadtong wala pa sila sa serbisyo ug karon nga anaa sila sa gahum.

Kana kun wala sila’y gikahadlokan.

Apan mura man og nahadlok sila sa bahad ni Davide nga ukbon ang ilang mga bank accounts. Kay mahitabo kini, basin og makita sa mga tawo ang katag.

Ang diversion karon sa kampo sa mga Garcia mao ang pagsinggit nga dili ang bank accounts maoy angay lili-on sa kampo ni Davide kun dili ang mga transaksiyon sa Kapitolyo.

Kun akoy pabut-on, maayong dunganon pag-utingkay ang mga transaksiyon sa Kapitolyo, ilabi na ang mga kontrata nga gisudlan sa executive department nga gipanguluhan ni Gwen, ug ang ilang mga kabtangan.

Maayong tan-awon og apil ang mga kontrata pagtabon sa Balili property sa Naga nga tago kaayong gihimo sa Kapitolyo nga wala i-agi sa hunta probinsiyal.

Pinaagi sa pag-utingkay sa mga transaksiyon sa Kapitolyo dungan sa paglili sa ilang mga bank accounts, mahibaw-an nato ang kalimpyo sa panerbisyo sa mga Garcia.

Ang resulta niini nindot nga basehan sa mga botante sa 2013 nga eleksiyon.

Sa mga government agencies, gi-uso kanang gitawag og “lifestyle check” sa mga opisyal. Gani, ang Ombudsman aktibo kaayo niini ug daghan na ang nangataktak sa katungdanan tungod sa lifestyle sa mga opisyal sa gobyerno nga dili sibo sa gidawat nilang suweldo.

Kining mga elected ug appointed officials sa gobyerno mao-mao ra man unta sila og suweldo, apan lupig ang mga appointed officials sa panguwarta sa mga politiko. Ug makita kini diha sa tagsatagsa nila ka lifestyle.

Pananglit adunay awhag nga ipa-ubos sa lifestyle check ang mga Garcia, mo-uyon kaha ang mga Sugboanon niini?

Maayo man kining lifestyle check kay anha makita ang ilang pagkinabuhi kun sibo ba sa suweldo ug kita sa ilang mga negosyo.

Naa man hinuon kini sila’y Statement of Assets, Liabilities and Networth (SALN), apan wala koy salig sa ilang pamaagi sa pag-file.

Maayo gyud nga adunay imbestigasyon sa ilang mga kabtangan aron mahibaw-an nato kun tinuod ang ilang pasiatab nga serbisyo ra gyud kining ila.

Maayo gani, apilon nato sa pag-awhag si Davide sa pagpublikar sa iyang bahandi.

Nianang paagiha, mahimong patas ang ilang pag-awhag sa pagbukas sa mga impormasyon sa mga deposito sa bangko sa mga Garcia, ilabi na ni Gwen ug Pablo John.