Pangandam human sa misa

Tanang pangandam sa mga tigpasiugda sa National Thanksgiving Mass alang ni San Pedro Calungsod karong Biyernes gitumong sa pagpahapsay sa pag-adto sa mga deboto sa 27 ka ektarya nga luna sa South Road Properties sa Dakbayan sa Sugbo nga himoan sa makasaysayanon nga kalihokan.

Hinaot nga maapil sa ilang pangandam ang pagtabang ug pagpahapsay sab sa pagpamauli sa mga deboto gikan sa SRP ngadto sa ilang mga pinuy-anan, labi nang mga sakop sa delegasyon gikan sa lagyo nga kalungsoran ug mga dakbayan. Lisod nang daan ang pagsud, apan nahadlok kong mas lisod ang paggawas sa SRP.

* * *

Tak-opan ang South Coastal Road gikan sa trapiko sugod sa alas-5 sa kadlawon. Tugotan nga makasud ang pribadong mga sakyanan nga hatagan sa mga tigpasiugda og pases tungod sa direkta nilang kapuslanan sa kalihokan. Tugotan sang makasud ang buses nga gitahasan sa libreng paghakot sa mga deboto gikan ug padung sa amihanan ug habagatang tumoy sa SRP.

Ang kinabag-an sa mga deboto nga way pases ni sakyanan gitambagan sa pag-agi sa Mambaling flyover. Kay maoy labing duol nga lakwan paingon sa templete ni San Pedro Calungsod. Gibanabanang 15 ngadto sa 20 ka gutlo ang baktas, di haom alang sa gagmay’ng mga bata ug mga hamtong nga masakiton.

* * *

Di ko gustong mopuno sa labad sa ulo sa mga tigpasiugda apan ang pagtubag sa mosunod nga mga pangutana makatabang sa pagpahapsay sa kinatibuk-an sa kalihokan, apil na sa pagpamauli sa mga deboto:

• Asa man mopahimutang ang pribadong mga sakyanan nga way pases ug busa kinahanglang ibilin sa mga tag-iya sa duha ka tumoy venue—duol sa baba sa tunnel sa mga dan Palma ug Serging Osmeña ug luyo sa Cebu Technological University sa amihanan ug sa tumoy sa South Coastal Road (SCR) sa habig sa Talisay City sa habagatan?; ug

• Unsa mang orasa ablihan ang SCR alang sa trapiko aron nga di matanggong ang labing menos tunga sa milyon ka deboto?

* * *

Maayo tingaling magpatabang ang mga tigpasiugda ni Ahmed Cuizon, Regional Director sa Land Transportation Franchising and Regulatory Board (LTFRB) sa Central Visayas, kinsa mao ray nakahunahuna sa pagpakatap og special trips sa dagkong buses sa mga ruta sa Sinulog Grand Parade inig sugod sa Grand Finale sud sa Cebu City Sports Center sa niaging duha na ka Sinulog.

Mahimong di sama kadaghan sa mga manan-away sa Sinulog ang mga deboto nga magpunsisok sa SRP karong Biyernes. Apan mas gamay ang mga agianan nga ilang kalutsan. Hinaot nga dayong human sa misa, may mag-atang nang buses sa SCR ug sa dan paingon sa Mambaling flyover nga andam nga mohakot sa mga deboto paingon sa amihanan ug habagatang Sugbo.

* * *

Email: [email protected].