Ayaw gud pagmika!

Sa tanang mga proyekto ug transaksyon sa kagamhanan, gikinahanglan gayud ang mga “monitoring personnel” nga tinud-anay gayud nga molaban aron dili mabentahaan ang gobyerno.

Nasayud na baya ta nga ang mga negosyante nagtinguha gayud nga makaganansya sila’g daku. Kun ang mga opisyal sa kagamhanan magmika ra ug magyugpos sa ilang mga bukton, alkanse ang gobyerno.

Kun ari ka sa pagsemento ug pag-aspalto sa mga karsada, posible nga nipison ra nila ang semento ug aspalto nga ibutang. Mahimong baga ang ipakita diha sa daplin apan sa tunga nipis.

Ang mga engineer suheto kaayo kun unsaon kini sa paghimo ug dili na kinahanglan nga ako pa nga idetalyi. Makaingon unya sila nga nagpatuga-tuga ko pagtuki nga dili ko engineer.

Kun ari ka sa pagpalawom sa atong mga sapa, ang daplin ra sa karsada ang ilang habwaan sa mga kontraktor kay mao may makita sa mga tawo ug dili apilon kadtong tua sa tuyoon nga bahin sa sapa.

Pananglit ang proyekto maglambigit sa pagsuplay og pagkaon, gamay ra usab nga pagkaon ang ihatag ug dili tukma sa kantidad nga gibayran o gikontrata nga maoy ideliver.

Kun tinuod man gani nga P110 ang matag “food pack’ niadtong pagkaon nga gisuplay sa ngadto sa mga polis, tanod ug civilian volunteers nga nagbantay   mga menteryo niadtong Kalag-kalag, na wala g’yud hinoon makaabut niini nga kantidad ang gideliver.

Gawas tingali kun lahi nga pagkaon ang gihatud didto sa mga nagbantay sa Dona Pepang cemetery diin ang Osmeña Mausoleum mahimutang.

Nasayran nako nga ang Lola Mary catering services ang nagsuplay og pagkaon sa mga nagbantay sa menteryo kay mao kini ang gikontrata sa City Hall.

Angay’ng ipasabut sa maong catering service kun pila man diay kantidad sa usa ka hiwa nga sud-ang karne, gamay’ng rice, gamay’ng desert ug tubig?

Unya ang laing ipasabut sa City Hall kun nganong daghan sa mga tanod ang wala makakaon? Ang ubang polis gud wala na lang modawat sa pagkaon para nila kay gipalabi na lang nila sa mga tanod.

Dili pagdaut sa mga higala nako nga opisyal sa City Hall kining ako, gusto lang nako nga makakat-on na unta sila kun unsay angay nga himoon.

Angay g’yud nga dunay mo-check-up kun tukma ba ang kantidad nga ilang gipalit. Lagmit ana moingon ang catering services nga gihatud man nila, apil ni sa cost.

Tinuod, apan daku ra kaayo ang kwentada sa cost sa pag-deliver kun mao na. Gibalik-balik nako kini aron magmatngon ang mga opisyal sa City Hall.

Ayaw kamo pagmika sa inyong trabaho.