Libakera nga silingan, unsay maayong buhaton

Ang atong balaod nagprotihir sa dungog sa usa ka tawo, lakip na sa iyang buhatan, negosyo ug panginabuhian. Sa ato pa, way si bisan kinsa nga adunay katungod nga modaut sa iyang isigkatawo ilabi na kun wa kini basihanan. Apan unsa bay angayang buhaton kun adunay usa ka tawo nga modaut sa imong dungog pinaagi sa pagpakatap og malisyuso nga mga pasangil? Kana nga pangutana ang atong tubagon karon.

* * *

Dear Atty. Divine,

Good day. Nag-email ko nimo tungod sa akong problema sa among silingan nga nagpakatap og dili maayong estorya batok kanako nga kuno ako adunay karelasyon nga minyo. Ako na nga giwarningan ning maong babaye kay silingan ra man namo sa pagbakwi sa iyang pamahayag ug sa pagpangayo og pasaylo tungod sa iyang gibuhat nga nakadaut sa akong dungog isip usa ka magtutudlo. Apan wa gyud gihapon kini mohunong ug nagsige gihapon kini og panglibak. Tungod niini, nakadesisyon ko sa paghatag kaniya og leksyon pinaagi sa pagpasaka og kaso batok kaniya. Ang akong pangutana atty. kun unsa man nga kaso ang mamahimo nako nga ipasaka batok sa akong silingan nga nagpakatap og sayop nga estorya batok kanako? Hinaut nga imong matubag ang akong pangutana. — Jessa

* * *

Dear Jessa,

Ubos sa atong balaod, ang si bisan kinsa nga mopakatap og way basihanan nga estorya nga makadaut sa dungog sa usa ka tawo, makadaut sa iyang buhatan, makadaut sa iyang negosyo ug makadaut sa iyang panginabuhian mamahimong makiha og Slander or Oral Defamation ubos sa Article 358 sa Revised Penal Code. Ang tawo nga miluwat sa malisyuso ug way basihan nga pasangil mamahimong mabilanggo kun maprobahan sa Korte nga sad-an sa maong kaso. Apan sa dili pa ka mopasaka og kaso batok sa imong silingan mas maayo nga inyong resolbahon ang inyong panagbangi pinaagi sa malinawon nga paagi. Mamahimo ka nga adto una mopasaka og reklamo batok kaniya sa inyong barangay kapitan aron mapatawag siya og magka-atubang mo aron pagresolbar sa inyong panag-away. Apan kun di gyud mo ma-areglo sa barangay level ug di gyud siya mohunong sa pagdaut kanimo, mamahimong imo nang ipasaka ang kaso batok kaniya. Hinaut nga akong natubag ang maong pangutana. — Atty. Divine

* * *

Kun pananglitan, ang pagbutang-butang sa usa ka tawo giapilan na og buhat sama sa pagtudlo-tudlo kaniya, pagtulisok kaniya or any acts o binuhatan nga nakahatag og kauwaw o kadaut sa usa ka tawo, mamahimo mo kining ikiha og Slander by deed.

Alang sa inyong pangutana, ipadala lang sa Legal Corner sa Banat News or email sa [email protected].