EDITORYAL - Filipino Grade 1 pa bahin sa pag-atiman sa basura

Paitang gradoha, tiguwang na Grade 1 lang gihapon, sumala sa mga tinugyanan sa DENR nga gipangayoan nato og grado sa mga Filipino kun hisgotan ang bahin sa tukmang pag-atiman sa basura.

Sakit pero maoy tinuod, kay kun atong sutaon kanus-a lang ipatuman sa kagamhanan ang waste segregation o pagbahig sa basura di ba niini lang bag-o.

Busa maingon nato nga sukad pa sa panahon ni Magellan, bag-o pa kitang  nagsugod-sugod pagkat-on bahin sa hustong pag-atiman sa basura kay wa kini itudlo sa mga eskuylahan kaniadto.

Tinuod may mga garbage can ang matag lawak sa tulunghaan apan basurahan nga alang sa tanan. Di ba?

May gitudlo ang mga magtutudlo nga compost pit, pero alang gihapon sa tanan , malata ug di malata unya padaoban pa ang basura sa maong lungag.

Busa ang mga magtutudlo   kaniadto sa panahon pa nila ni Dr. Jose Rizal way kaalam bahin sa basura hangtod ang mga gitudloan niini nga nahimong mga ngilngig nga politiko ug gani kasagaran kanila tua na sa lubnganan, mitaliwan nga wa gyuy gikatudlo sa   publiko bahin sa paghatag og respeto sa maayong pag-atiman sa basura.

Ang mga kaliwat sa maong mga magtutudlo ug mga politiko maoy nagdumala karon sa nasud ug miumol man tuod og balaod bahin sa basura apan gihimo lang nga “for your eyes only” ang maong balaod kay wa man kini butangi og tango aron pugson    ang matag tagbalay   sa pagkat-on sa hustong pag-atiman sa ilang basura .

May mga opisyal sa barangay nga maoy pinakagaway sa goberno sa pagpatumang estrikto bahin sa pag-atiman sa basura apan wa molihok kay way umoy kay gikapoy sa ilang trabaho.

Usa sa hinungdan mao nga maikog ug mahadlok motudlo pag-ayo ang maong mga opisyal sa barangay ngadto sa matag molupyo bahin sa pag-atiman sa ilang basura sa kabalaka   nga masuko ang tawo ug di na mobotar kanila sa panahon sa election.

Gumikan niining kinaiyaha, magpabilin kitang Grade 1 bisan mga tiguwang na bahin sa hustong pag-atiman sa basura. Haskang paita.