Loyalty check

Niining panahon sa eleksiyon kumon ang loyalty check sa mga politiko.

Dunay mga gobernador nga mosuway unsa ka loyal ang mga opisyal sa kalungsoran ngadto niya.

Ang mga mayor mosuway sab sa iyang mga kaalyado kun nagpabilin pa ba kini sa ilang suporta ngadto kaniya.

Normal ni alang sa mga politiko, apan ang pagduhig sa mga ordinaryong trabahante sa gobyerno niini dili husto.

Kini tungod kay ang mga kawani sa gobyerno hugot nga gidid-an sa balaud pagsalmot sa mga kalihukang politikanhon.

Ubos sa lagda sa civil service ang mga kawani sa kagamhanan gidid-an pag-apil sa kalihukan sa politika.

Apan nganong dunay mga politiko nga labihan ka mubo og salabutan nga dili makasabot niini?

Nganong dunay mga politiko nga labihan ka baga og nawong nga manungko sa mga kawani sa gobyerno paglapas sa lagda.

Pananglitan dinhi sa dakbayan sa Sugbo, gitagsa-tagsa ni Mayor Michael Rama ang tanang departamento sa City Hall pagpahigayon og loyalty check.

Iyang gipatawag ang mga kawani aron pagsuta kun sila iya bang mga supporters.

Sigun sa pipila ka mga kawani nga gipatawag, gitagsa-tagsa kuno sila og lamano sa mayor.

Kadtong mga markado nga suporter sa iyang kontra nga si Kongresista Tomas Osmeña giingnan nga "baga og nawong" uban ang bahad nga taktakon sa trabaho.

Usa sa mga gitaktak sa mayor mitug-an nga nasuko si Rama kaniya tungod kay dihang gisugo siya pag-imbitar og mga tawo nga motambong sa pulong-pulong way bisan usa nga mitungha.

Matud sa maong kawani nga sukad niadto gitaktak siya ni Rama isip maestro sa vocational school nga gidumala sa dakbayan.

Kun tinuod ang pangangkon sa maong kawani, kaluoy sa mga empleyado sa City Hall.

Lupig pa nilay piniriso nga gihikawan sa katungod kinsay ilang suportahan nga kandidato.

Isip abogado nasayod si Rama nga ang katungod sa pagpili og kandidato nga imong gusto usa ka sagradong katungod sa matag mulopyo ning nasud nga gigarantiyahan sa atong Batakang Balaud.

Ang mga kawani sa City Hall dili angayang pugson ni Rama nga mosuporta niya tungod kay dunay tagsa-tagsa ka katungod ang maong mga kawani kinsay ilang gusto.

Ang pagpanghulga ni Rama nga taktakon sa trabaho ang mga di mosuporta niya usa ka batasan sa tawong diktador.

Way luna ubos sa landong sa demokrasya nga panggobyerno ang mga politiko nga may dugo sa usa ka diktador.

* * *

[email protected].