Pilay kantidad nga angayang isuporta sa amahan?

Sagad sa lalisan sa magtiayon nga magbuwag mao ang kantidad sa suporta nga ihatag sa amahan matag buwan alang sa inadlaw nga panginahanglan sa ilang mga bata. Ang atong balaod sa Family Code sa Art. 201 nagkanayon, nga ang amount of support kon kantidad sa suporta magdepende sa panginahanglan sa mga bata ug sa kapasidad sa maghatag og ayuda. Apan unsay angayang buhaton kun magkuwang ang suporta nga ihatag sa amahan? Kana nga pangutana maoy atong tubagon karon.

* * *

Dear Atty. Divine,

Good day, kanunay jud ko tigbasahan sa imong column,nagpasalamat jud ko sa imong column atty. kay makapangutana jud ta og libre. Tawga lang ko sa pangalang Bea ang ako problema mahitungod sa akong kaminyoon,nagbuwag mi ug sa akong bana, naa siya karon nag-stay sa iyang parents, aduna mi anak 2 kabuok, 7 yrs old and 1 yr old, kasado mi sa pari,ang ako bana nagtrabaho sa usa ka private company mo net siya og 10,000 a month, unya mo hatag ra siya nako og 4 mil matag buwan, para sa ako atty. kuwang jud ang iya e hatag para sa among mga anak ,kay ako sweldo igo ra sad ibayad sa mga utility bills sa balay, nahug na hinuon atty, nga mas dako pa siya og share nga iya ra man unta kaugalingon iya gibuhi,ang akong pangutana atty. pila man jud ang sakto nga sustento para sa akong mga anak? pwede ba nako siya mapasakaan og kaso? ug unsa man nga kaso? kana lang untang gamay ra ang gasto ug dali ang proseso? Daghang salamat!

—Bea

* * *

Dear Bea,

Mao ni sagad nga problema sa ubang mga inahan nga biyaan intawon sa ilang bana, magkuwang ang ihatag nga suporta sa ilang mga anak, ilabi na gyud karong panahona nga mahal ang mga palaliton ug uban pang mga bayranan. Kun duha ang inyong anak, kwentaha kun pila gyud ang ilang magasto matag buwan sa ilang pagkaon, edukasyon, transportasyon, tambal, mga senina, inyong abangan sa gipuy-an, kuryente ug tubig. Kanang maong kantidad maoy imong basihan sa amount nga imong pangayuon sa imong kanhi bana. Ang kantidad sa suporta mamahimo na nga paumentuhan, mamahimo sab nga paubsan, depende sa panginahanglan sa mga bata ug sa kapasidad sa amahan nga naghatag kanila og ayuda. Karon nga nagkuwang ang iyang suporta mamahimo kang mopasaka og reklamo sa imong bana apan medyo taas gyud ang proseso kay moagi pa man kini sa Korte. Ang maayo nimong buhaton karon mao ang paghangyo sa imong kanhi bana nga pun-an ang iyang suporta pinaagi sa paghatag kaniya og demand letter gikan sa imong abogado unya imong kwentahan sa inyong gastuhan matag buwan ug mangayo ka niya og dugang sustento. Kun mobalewala lang ang imong bana sa maong hangyo, mamahimo kang modangop sa Korte aron ang Huwes na ang mopatawag kaniya ug maoy modesisyon kun pila ang iyang angay’ng ihatag nga suporta. Hinaut nahatagan ka og katin-awan sa imong pangutana.

— Atty. Divine

* * *

Dili lang ang mga anak ang mamahimong mangayo og sustento basi sa atong balaod kondili lakip na ang asawa ilabi kun adunay pending nga kaso sa Legal Separation, Annulment o Declaration of Nullity of Marriage. Ang Petitioner nga asawa mamahimong mangayo og Spousal Support ngadto sa bana ilabi na kun ang maong bana maoy nagdumala sa ilang kabtangan. Kun adunay kabtangan ang magtiayon ang suporta alang sa asawa adto kuhaa sa income sa ilang properties.

Alang sa inyong pangutana, ipadala lang sa Legal Corner sa Banat News or email sa [email protected].