Anti-dengue larvicide campaign sa Minglanilla

Malampuson ang pagsugod sa massive anti-dengue larvicide campaign sa lungsod sa Minglanilla kagahapon.

Gisugdan ang kalihukan pinaagi sa caravan nga nagsugod sa Plaza Maria atubangan sa Immaculate Heart of Mary Shrine sa Minglanilla paingon sa amihanan agi sa national highway ug pag-abot sa Linao balik paingon sa habagatan lahos sa barangay Tunghaan.

Dungan niini, gihimo ang pagpang-apod-apod ug pagpamutang og “abate” (temephos) ngadto sa 230 ka mga identified breeding sites sa 19 ka barangay sa Minglanilla.

Nangulo sa pagpamutang og abate larvicidal mao si Konsehal Jojo Selma, inubanan sa mga sakop sa Rotary Club of Cebu Minglanilla pinanguluhan sa presidente, Lumen Selma Cañedo, Immaculate Heart of Mary Shrine pinanguluhan ni Fr. Jojo Deligero, mga negosyante sa Minglanilla, mga opisyal sa barangay ug Barangay Health Workers (BHW).

Si Konsehal Jojo Selma, chairman sa committee on health sa konseho sa munisipalidad, nagkanayon atol sa gipahigayon nga press conference sa kalihukan sa conference room sa Immaculate Heart of Mary Shrine, nga hingusgan nila ang kampanya sa dengue bisan sa kakulang sa kooperasyon sa mga lumolupyo.

Si Lumen Cañedo nagkanayon nga atol sa larvicidal operations sa 19 ka barangay, nakapang-apod-apod sila og 15 ka kilos nga abate.

Kining abate, sumala pa ni Dr. Wyben Briones, usa kini ka larvicide nga isabwag lamang sa tubig nga giitlogan sa mga lamok (Aedes aegypti). Sulod sa duha ngadto sa upat ka bulan, pamatyon sa abate ang mga larvae. Kining larvae kun dili mamatay matigulang ug mahimong lamok.

Si Fr. Jojo Deligero, sa pakighinabi kaniya, nagkanayon nga buot sa simbahan nga mapadayon kining maong programa pinaagi sa panagtinabangay sa nagkalainlaing sektor.

Giawhag hinuon ni Konsehal Jojo Selma ug Lumen Cañedo ang mga tawo sa pagkooperar sa programa aron mapapas ang Minglanilla sa listahan sa Department of Health-7 nga usa sa nag-unang lungsod nga labing daghan og kaso sa dengue.

Manghinaot lang usab ko nga mokooperar ang mga opisyal sa barangay niining maong anti-dengue program.

Sa akong nahibaw-an, ilusad og balik ni Konsehal Jojo Selma ang clean and green program subay sa kampanya paghimo sa Minglanilla nga “zero dengue” sa umaabot nga mga tuig.

Kun mapatuman, ang mga barangay maoy mag-una sa kampanya niining clean and green program.

Apan kun walay kooperasyon sa mga opisyal sa barangay ug sa mga residente, makuli nga magmalampuson kini.

* * *

Andam na ang kampo sa administrasyon sa Minglanilla pagsang-at sa sertipiko de kandidatura sa ilang mga kandidato.

Kumpleto na ang line-up sa grupo nga gipanguluhan ni Mayor Eduardo Selma, Bise Mayor Lani Peña ug Konsehal Jojo Selma.

Si Lani Peña maoy gitudlo sa grupo nga padaganon pagka-mayor.

Nasayop ko sa akong pangagpas nga si Konsehal Jojo Selma ang padaganon pagka-mayor tungod kay maoy nadesisyonan sa grupo nga si Jojo Selma maoy padaganon pagka-bise mayor.

Hinuon, si Jojo Selma batan-on pa kaayo ug taas-taas pa og katuigan diha sa serbisyo. Hinuon, kining pagka-bise mayor usa ka dakong training ni Jojo Selma.

Adunay mga mayor karon nga hilabihan kamalampuson sa ilang liderato sa ehekutibo tungod sa iyang dakong background sa lehislatura tungod sa pangalagad isip konsehal ug bise mayor sa wala pa mahimong mayor.

Nindot kaayong paminawon nga wala gamita ni Jojo Selma ang iyang “clout” isip anak ni Mayor Eddie Selma ug pagkapag-umangkon sa kapikas ni Kongresista Eduardo Gullas nga si Mam Mingming Gullas. Kay kun sa uban pa, gamiton dayon ang pamilya aron makuha ang labing taas nga puwestong daganan.

Apan si Jojo Selma nagpaubos ug nagmatinahuron sa desisyon sa ilang grupo nga si Bise Mayor Lani Peña lang una ang ilang suportahan pagka-mayor sa 2013 nga eleksiyon.

Ang line-up sa mga konsehal ubos nilang Peña ug Selma nakumpleto na usab.

Hilabihan hinuon nakong kalipay nga naapil sa line-up akong higala nga kanhi bise mayor sa Minglanilla. Ang negosyanteng kanhi konsehal usab sa Minglanilla nga si Jimmy Caumeran naapil sa line-up.

Apil usab si Loben Geonzon, igsuon ni Atty. Lynnete Geonzon.

Ang grupo nakadesider usab sa pag-apil sa line-up ni Mayor Eduardo Selma tungod sa “wisdom” niini nga ila pang gikinahanglan.

Apil usab sa line-up silang Manolo Delgado, kapitan sa Tungkil nga maoy ABC federation president sa Minglanilla; Samuel Adlawan Jr., Rajiv Enad, Edwin Quiapo ug Roy Nacario.