Tom ug Mike

Kun tinuod man nga si Kongresista Tomas R. Osmeña gihatagan na og certificate of nomination sa Partido Liberal nga nag-ila kaniya nga maoy official candidate nila sa pagka mayor sa dakbayan sa Sugbo, angay nga si Mayor Michael Rama dili na magpaabot pa nga hatagan usab siya sa maong nomination.

Basi sa lagda sa Commission on Elections, dili mahimo nga ang usa ka partido mohatag og certificate of nomination nga subra sa usa ka elective position. Sama nga usa ra man ang pilion sa pagka mayor, aw usa ra g’yud ang ilang ihatag.

Unya kay miingon na man si Tommy nga aduna na siya’y nomination certificate nga gihatag sa LP, tan-aw nako imposible na kaayo nga si Mayor Rama hatagan usab sa Liberal Party sa susama nga nominasyon.

Mao kana nga mas maayo nga kay sa Lunes magsugod na man ang pagsang-at sa mga certificates of candidacy (COC), angay’ng dili na tingali molaum pa si Mayor Rama sa suporta sa LP.

* * *

Ang baruganan ni Mayor Rama mao nga dugay na siya nga nahimong sakop sa LP ug wala siya makahimo og sayop sa ilang mga lagda. Mao nga iyang baruganan nga walay rason nga isalikway siya sa partido ug si Tommy maoy pilion.

Apan ingon gayud niana ang mahitabo kay duha man sila nga sakop sa LP nga managan sa usa lang ka pwesto, natural nga mopili gayud ang ilang mga opisyal sa partido kun kinsa kanila ang ilhon nga opisyal nga kandidato.

Unsa ba gayud ang bentaha kun anha ka mosandig sa LP, nga naa may ubang partido? Ang tubag niini mao nga kun anaa ka sa Liberal Party maisip ka nga administration candidate kay LP man ang atong Presidente.

Usa nga bentaha kun nakasandig ka og partido mao nga makakuha ka og kopya sa election returns nga mahimo nimo nga tamdan ug himoan og kinaugalingon nga kwenta kun nakadaug ka ba sa eleksyon.

Kun independente gud, dili ka hatagan og kopya sa election returns sa Comelec. Ang laing rason mao nga dunay mga botante nga mobotar dili sa kapasidad sa kandidato kun dili basi sa partido.

Nahinumdom pa ko sa akong amahan dihang bata pa ako kaniadto nga hilabihan ka “die hard” sa Partido Liberal. Duna siya’y mga apelyedo sa mga bantugan nga politiko nga kanunay niya nga litukon ug mao nga hangtud karon nasilsil kaayo kini sa akong alimpatakan.

Kanunay usab nga maminaw ang akong amahan kaniadto sa mga diskurso sa mga sakop sa “speakers bureau” sa LP. Natandi nako nga pagkanindot pamation sa mga diskurso kaniadto, apan karon inanay na nga nausab. Dunay uban nga modiskurso pero walay unod.