Naglibog
Nalingaw ko nga naminaw sa talent manager ug actress nga si Annabelle Rama dihang iyang gitagsa-tagsa unsay iyang buhaton kun siya modaog isip kongresista sa north district sa dakbayan sa Sugbo.
Unang butang nakalingaw nako mao nga naniguro na siyang daan sa iyang kadaugan batok ni bisan kinsa nilang kanhi kongresista Raul del Mar ug sa anak niini nga si incumbent congresswoman Cutie del Mar.
Ikaduha, iyang gipasaligan ang mga butante nga dili silang magmahay pagpili niya.
Kini tungod kay matud niya dili siya modawat og sweldo ug ang katunga sa iyang kita isip talent manager didto sa kaulohan iyang ihatag sa mga kabus nga molupyo sa dakbayan.
Pasalig ni Rama nga iyang sulbaron ang problema sa drainage ug trapiko. Tungod kay dako ang kwarta nga kinahanglanon aron matuman ang maong saad, matud ni Rama nga magpatabang siya sa iyang mga higalang adunahan aron paghimo niini.
Ug ang mas nakapahimuot nako mao ang iyang tubag sa pangutana sa usa sa mga reporters kun unsay iyang unang balaud nga himuon didto sa kongreso.
Matud ni Rama nga wala pa siyay nahuna-hunaan unsay iyang prioridad sa kongreso tungod kay matud niya bag-o pa siya sa politika.
Apan iyang gipaniguro nga tungod kay bag-o pa siya sa politika dili pa siya'ng kamao mangawat.
Wala kuno siya mosulod sa politika aron magnegosyo kun dili aron moserbisyo.
Nahimuot ko nga namati niya tungod kay samtang iyang gisubli-subli nga bag-o pa siya sa politika apan ang iyang gipamulong way kalainan sa mga tadhan nga politiko nga himuon ang tanang saad atol sa eleksiyon aron lang modaog.
Labaw pa kong nahimuot niya tungod kay klaro gyud intawon siya kaayo nga wala gyuy nahibaw-an sa buot niyang sudlan.
Laliman ba gud kay molansar siya isip kongresista apan wala pa diay siya maghuna-huna unsay iyang buhaton ig-abot niya sa kongreso.
Maoy iyang nasabtan nga ang trabaho sa kongresista igo lang pagpanghatag og hinabang sa mga kabus ug pagpatukod og mga proyekto.
Intawon pud! Mamahimong sinsiro si Rama sa iyang tumong busa kun ako’y ikaw ayaw sa kongreso pagpapili. Mas haum kang magmayor sa dakbayan basi sa imong plano kay sa imong ig-agaw nga si Mike.
***
- Latest
- Trending
