Totol vs Bebot

Human mosibog si kanhi kongresista Antonio Cuenco sa iyang kandidatura pagkakongresista sa South District dinhi sa dakbayan, daling gisagop sa Team Rama si kanhi DOTC undersecretary Aristotle "Totol" Batuhan.

Gipahibawo sa kampo ni Batuhan sa miaging semana nga siya maoy mamahimong opisyal nga kandidato pagkakongresista sa Team Rama diha sa habagatang distrito.

Iyang ikaatbang ang kandidato sa Bando Osmeña Pundok Kauswagan nga si Konsehal Rodrigo "Bebot" Abellanosa.

Sa maong tapad sa mga pilionon way duda nga llamado ang BOPK. Dili tungod kay mas may kahigayonang modaug si Abellanosa batok ni Batuhan kun dili tungod kay ang duha pulos man kaalyado ni Kongresista Tomas Osmeña.

Ang mahitabo sa south district dili Team Rama batok BOPK kun dili BOPK batok BOPK.

Busa bisan asa nilang duha maoy mudaog sa eleksiyon sunod tuig BOPK gihapon maoy mogawas nga mananaog.

Sa mga pasiunang survey giingong nag-una si Abellanosa hinungdan nga siya maoy nahukman sa grupo nga himuon nilang kandidato.

Apan layo pa ang eleksiyon, daghan pa ang posibling mahitabo. Magpabilin pa kaha ang maayong resulta sa survey pabor ni Abellanosa taliwa sa isyu batok niya?

Usa sa dakong isyu nga mamahimong makapaapiki ni Abellanosa mao ang pasangil sa conflict of interest.

Si Abellanosa tag-iya og tunghaan diin usa sa mga gihatagan og pagtugot sa dakbayan pagpatuman sa scholarship program niini.

Isip sakop sa konseho nga maoy nihatag og pagtugot alang sa maong programa, dili ba tataw nga duna tinuoy conflict of interest ang paglakip sa iyang tunghaan?

Nakadungog ko nga duna pay laing mga lakang nga giandam ang iyang mga kaatbang aron pagkwestiyon sa mga transaksiyon sa tunghaan ni Abellanosa uban sa dakbayan, dili kaha ni moepekto sa iyang maayong rating sa survey?

Usa ray mamahimong dag-anan ni Abellanosa batok ni Batuhan taliwa niining pasangil sa kontrobersiya. Kini kun badlisan ni Kongresista Osmeña ang ilang mga suporters.

Apan kun lugakan sa kongresista ang mga suporters sa BOPK labi pa nga maisip man sab niya nga kaalyado si Batuhan posibling ang naawahi maoy sunod nga kongresista sa south district.

Alang nako mas makatabang si Batuhan sa interest ni Osmeña sa SRP kay ni Abellanosa tungod kay si Batuhan abogado.

* * *

[email protected]