Nikabat sa kapin 111 bilyones pesos ang kantidad sa mga wa’ magamit ug wa’y gamit nga tulay nga giingong natukod panahon sa administrasyong Arroyo. Karon, giutingkay ang maong mga proyekto walo ka buwan sa dili pa ang midterm elections. Kung unsa man ang tumong sa mga sama ni Senador Serge Osmeña nga maoy nibukas sa kontrobersiya sa media, igo lang ‘ta sa pagtag-an nga makabenepisyo siya og dako labi pa nga hapit na ang piniliay. Apan kung unsa man kadudahan ang motibo sa mga politiko nga nipatigbabaw sa kwestyonable nga mga tulay nga wa’ mahuman, wa’ magamit ug wa’y gamit sa lugar—wa’y makakwestyon sa pagduda sa katawhan unsang pagka-unsaa nga nakagasto ang milabay nga administrasyon og binilyon ka pesos alang sa maong mga proyekto.
Karon, wa’y muangkon kinsa ang responsable sa pagtukod sa mao nga mga tulay labi na ning panahon nga nagsige ang pagbaha ug pagsaka sa tubig sa mga kasapaan nga wa’y lig-ong tulay nga magamit sa mga tawo sa paglabang. Igo nalang ‘ta sa pagpangawot sa dili katol apan laing pag-usik-usik sa salapi ang maong mga kwestyonableng proyekto. Wa’y muangkon nga politiko nga nagpaluyo sa pagtukod sa maong mga tulay. Apan kung mga lakang palang unta nga daghan ang makabenepisyo, mag-inilugay na ang mga politiko sa pag-angkon kinsa ang tinuod nga nagpaluyo aron matuman ang proyekto. Ug bisan wa’ pa mahuman ang konstruksyon, paspas pa sa kilat nga nakabutang sa ilang mga karatola nga nagpahibawo sa katawhan nga nahimo ang tanan tungod sa ilang mga paningkamot.
Kung tan-awon ang mga tarpaulin ug uban pang mga karatula sa mga politiko nga nagpahibawo sa ilang mga proyekto, daw kita pa ang dako og utang kabutbut-on nila. Sila ang mga tawo nga mga baga og nawong o mas giila karon nga ‘epal’. Mas maayong susihon nato ug tugkaron nga ang pag-alagad sa katawhan wa’ magkinahanglan nga ipahibawo ang mga nabuhat, wa’ kinahanglana nga ibalandra ang dakong panga’n nga daw giangkon na ang proyekto nga ilaha. Usahay, malibog pa ‘ta kung kinasing-kasing ba ang ilang pagpahibawo sa katawhan sa ilang mga proyekto o nagpahibawo lang og mas sayo-sayo aron di’ makalimtan sa buwan sa Mayo.
Daghang bilib natong mga Pinoy kung atong abilidad sa halos tanang bahin na ang hisgutan. Apan luyo sa kabaltok sa atong mga politiko, mao ‘sab kabaga ang nawong sa uban nga magpataka nalang pagbutang sa ilang mga panga’n ug dagway aron mas maila sa katawhan ang ilang mga nahimo. Usahay, ipaagi pa og outdoor advertisement ang ilang mga bag-o kuno nga programa sa radyo. Apan kung iphon ang gidaghanon sa ilang mga posters nga nag-promote sa ila kunong radio program, pirting daghana nga makatuo kang di’ na ang ilang programa ang ilang gipahibawo sa katawhan apan ang mas lawom nilang tinguha sa pagdagan og laing posisyon. Ang ubang mga politiko, bisan ang mga trapal nga gigamit sa mga haya sa patay, anaa ang ilang mga panga’n. Ang uban, gibutang sa public building, mga sakyanan, pader ug bisan gani tabon sa imburnal.
Karong Sabado sa programa nga Tubag, alas siete sa buntag sa ABS-CBN, mas natong mapaladman ang pagtuki sa maong matang sa politiko. Sa ilang gihimo, nagtuo ba ‘ta nga pagpahibawo lang sa ilang mga nabuhat ang mga tarpaulin ug uban pang karatola? O nangampanya na sila og sayo aron makabintaha sa mosunod nga piniliay? Ug kung ikaw ang pasultihon, angay pa ba silang iboto sa ilang gihimong pag-gara-gara sa mga kuno nahimo nga mao gyud ni ang rason nganong gitudlo sila sa katawhan.
Email: rico_lucena@abs-cbn.com or ricolucena@yahoo.com