Blocktimer si Mayor

Tagbilaran City, Bohol—Samtang nagpadayon ang pagsaulog sa Broadcasters Month ug Press Freedom Week sa Sugbo, lahi nga hulga sa kagawasan sa prinsa ang akong nasaksihan dinhi. Si Tagbilaran City Mayor Dan Lim may programa sa radyo gikan sa Lunes hangtod sa Sabado. Wa siya’y accreditation sa Kapisanan ng mga Brodkaster ng Pilipinas. Apan wa ning kapugong niya sa way pagpangisog sa iyang mga komentaryo.

Labaw sa pagdudang nasakripisyo ang iyang pagduma sa siyudad kay nagtungkawo sa mikropono, ang pangutana sa kamakiangayon sa paggamit sa media sa labing gamhanang opisyal sa Tagbilaran aron pagpakauwaw sa iyang mga kaatbang.

***

Di si Lim maoy una, ni maoy kataposan nga opisyal sa gobyerno nga nangunay pagsibya sa ilang hunahuna. Mas unang nagduma og mga programa sa radyo si Talisay City Mayor Soc Fernandez. Apan si Fernandez wa motuki sa mga kontrobersiya sa City Hall, nga daghan uyamot, kay nitingob sa iyang panahon pagtubag sa mga pagsaway batok sa Simbahang Katoliko.

May programa sa telebisyon si Davao City Vice Mayor Rodrigo Duterte, apan kausa ra sa usa ka semana. May programa sa radyo si Kongresista Tommy Osmeña, apan motingog lang kun ganahan. Lupig hinuon silang tanan ni Gobernador Gwen Garcia kay may cable channel ug pamantalaan nga tungod ug alang ra gyud niya.

* * *

Si Lim may kasaysayan nga di mahigalaon sa iyang mga gikasungi. Nakonbikto siya sa kasong kriminal nga gipasaka ni Komentarista Choy Torralba nga nabiktima sa iyang pagpanagmal. Gikiha siya atubangan sa Visayas Ombudsman ug gireklamo sa Commission on Human Rights tungod sa pagpaputol sa linya sa kuryente sa komentarista ug technician sa radyo nga gipasanginlang nanaway niya.

Gipasanginlan sab siyang nanghasi sa lokal nga pamantalaan ug sibyaanan sa radyo nga nibutyag sa mga pasangil sa kahiwian batok niya. Maong abunda ang sukaranan sa kabalaka nga di ang labing maayong interes sa labing daghang Bol-anon ang ipatigbabaw sa iyang mga sibya.

* * *

Nabantang ang makalilisang nga epekto sa inadlaw nga mga komentaryo ni Lim dihang way huwes sa Tagbilaran nga nidawat sa kinauwahiang kaso nga gipasaka batok sa iyang pamunoan. Ang huwes nga nangahas unta pagdawat nidalidali og sibog, human gikatahong gipasidan-an ni Lim sa radyo.

Buhis sa mga Bol-anon ang gibayad sa mga sibya. Mao ba ni ang labing dinaliang panginahanglan? Labaw sa mga libaong sa kadalanan, wa makolektang basura, pagsulbong sa mga kaso sa dengue ug naghitak nga ilegal nga drugas ug sugal? Mahimo hinuong wa katabang sa kahimsog ni Lim ang iyang mga sibya sa buntag ug hapon—na-ospital siya karong bag-o ug nikatap sa YouTube ang footage sa sibya nga labihan niyang dukaa nga diriyot maparok sa mikropono.

* * *

Email: [email protected]