Oil drilling sa Sugbo

Gibalita nga adunay usa ka pundok sa investors gikan sa Australia nga mosugod sa dili madugay sa pagpangitag oil kon lana dinhi sa Sugbo. Ang drilling kon pagpangutkot himoon sa duha ka dapit sa Sugbo -- didto sa Carcar City ug sa Aloguinsan.

* * *

Kini suma sa balita. Ang mga Australyano nagtuo nga dunay dakong deposito sa lana sa gihisgutang duha ka dapit dinhi sa ato.

* * *

Kini kunong oil drilling nga himoon dinhi sa Sugbo mao kining unang drilling sa yuta. Ang mga drilling nga nahimo na sa Pilipinas pulos sa dagat.

* * *

Manghinaut kita nga tinud-anay kining oil drilling dinhi sa ato, kay matud pa ni Energy Undersecretary Jose Layug mopakusog kini sa pagpalambo sa Sugbo ug sa tibuok nasud.

* * *

Pero wala kahay mga pundok nga mobabag niini, sama sa ubang proyekto nga gipasiugdahan sa mga foreign investors? Daghan bayang mga proyekto diin ang katuyoan mao ang pagpalambo sa nasud apan giprotestahan sa pipila ka mga militanteng grupo.

* * *

Akseptado si Undersecretary Layug nga dunay mga complaints nga motumaw gikan sa local communities diin ang drilling himoon. Dili parehas sa drilling sa dagat nga walay mga residente nga maapektahan.

* * *

TRIVIA. Maayong buntag sa atong mga higala diha sa Danao City ug kasikbit nga mga dapit. Salamat sa inyong nagpadayon nga suporta sa Banat News.