Love your enemies

Kun nagsunod ka’g badlungon kaayong sakyanan nga bisan kahinay sa pagpadagan didto kini mosubay sa fast lane ug mipatunga-okupar pa gyud sa duruha ka lugar-agianan, diin maglisod ka na hinuon sa pag-obertik, unsay imong bation? Ikaw ba ang matang sa drayber nga mobukal dayon ang dugo ug nangita dayon og mga paagi unsaon pagbalos sa maong buluyagong tsuper?

Kun ikaw mao kini, ayaw padala sa imong nagkayo nga pagbati. Stay calm and love your enemies. Love others as you love yourself. Ngano? Kay kun ikaw maglagot pilde ka na daan? Ngano? Ang kalagot iyaha sa yawa, diin magdulot lang hinuon kini nimo og dugang kasakit.

Hunahunaa lang kun magpadala ka sa imong kasuko. Gukdon nimo ang hinay’ng sakyanan nga wala magsubay sa hustong linya. Naghuwat ka’g igong higayon nga makasikit niini aron pakalitan og cut agi sa iyang atubangan, diin human nimo ma-obertiki, tuyoon nimo pagyatak ang brake sa imong kotse aron siya nga magsunod, maratol. Mag-unsa kaha kun ang drayber sa maong sakyanan nakalitan tinuoray? Unya natarantar? Nadumbol gyud sa likod sa imoha, diin maayong pagkagusbat sa duruha ninyo ka behikulo? Dili ba naghatag lang og laing dakong problema? Siyempre, mahayblad gyud ka’g samot? Delikado pa’g imong mapusilan ang kontra ug imong mapatay?

Tambag lang. Ayaw gyud padala sa imong kasuko. Anger and hatred are evil emotions. So, love your enemies. Pasagdi nga makat-on sila pinaagi sa maayo nimong taras. Kay sa mahimo silang alaot gumikan sa imong kalagot ug pagdumot. Dili kay sila lang ang mahimong alaot. Lakip ang imong kalag, mapagan usab. Thus, better love your enemies.

Dinhay bagis nga nadunggaban. Nawad-a’g panimuot sa dalan. Nadala sa ospital, gitabang, gitambalan ug naayo. Pagkakita niya sa doktor, kinsa maoy mihatod sa bagsik sa tambalanan ug mao mismoy nangunay sa pagluwas sa iyang kinabuhi, nakurat ang bugoy. Kanhi gud sa hayiskol pa silang duha nasumbagan niya ang maong mananambal.

Ug wa gyud kini makabawos niya. Wa siya magtuo nga kun kinsa ang kontra niya kaniadto mao pay nakasalbar niya karon.

Human sa maong mithi nga anaa sa kasingkasing sa doktor, nabut-an ang bugoy. Nangayo siya’g pasaylo sa doktor ug nalipay ang doktor nga mipasaylo kaniya. Labi na kay wa mangayo’g bayad ang mananambal, mitulo ang mga luha sa nabag-o nga tawo, uy.

Mao kini ang espirituhanong bunga sa pag-Love your enemies. Nindot ug makapahinuklog, no? Atong sundon!