EDITORYAL - Ang mga tanom ug ang pag-compost sa basura

Ang laraw nga pailisan og mga mamungang kahoy (fruit trees) ug mga utanon ang tanang mga tanom sa daplin   ug sa tunga sa kadalanan ning siyudad murag lisud kaayong matuman tungod sa kinaiya sa mga Sugbuanon nga puwerting pilita og kamot.

Ang kakiriwan sa tawo lisud kaayong pugngan ilabi na sa mga batan-on nga naanad na niini apan di kasilotan tungod kay protektado sila sa balaod.

Gisugyot sa usa sa mga kanhi magbabalaod sa konseho ning dakbayan kinsa usa ka matawag nga environmentalist nga ang angay ipananom sa kadaplinan ug tunga nga bahin sa karsada mao ang mga kamunggay, agbati ug uban pang makaon nga tanom, ilis sa mga bombil ug uban pang mga misitas nga gipananom sa maong mga lugar.

Pagkaanindot baya sa maong suhestiyon apan di ba kaha kini makahatag og dugang labad sa ulo sa kapolisan kay basin mosamot ang krimen sa maong higayon.

Kay ibutang ta naa nay bunga sa nangka nga hinog, unya ang mga kawatan nga nag-iyahay og plano nga mokawat niana magkaabot sa usa ka higayon ug mag-inilogay sa maong bunga ug magpinatyanay, di ba dako kaayo ang problema nga sagubangon sa atong mga otoridad.

Apan tinuod baya nga ang pag-agni sa katawhan nga magtanom og mga prutas ug utanon usa baya gayud ka sagrado kaayong butang kun matuman kini sa tawo.

Kay mao unta kining   mga tanoma ang   bundakan sa kagamhanan sa iyang abuno nga organic nga gikan sa nakolekta niining mga basura matag adlaw gikan sa kabalayan ug di na hakuton pa ngadto sa Consolacion.

Unya kay ang nahitabo karon sa kataspokan sa atong mga kadagkoan sa kagamhanan paghimo og kaugalingong   compost, ato lang gisalibay ug giusikan ang atong malata ug himoonon untang organic nga abuno . Busa magpunay ta og wali sa atong katawhan nga maghimo og compost apan ang atong mga kadagkoan wa mobuhat   sa ingon pikatan lang sa katawhan sa ilang mata ang maong mga opisyal.

Ang angay gyud unta nga buhaton sa matag opisyal sa kagamhanan sa matag barangay mao paglibot sa kabalayan pagtudlo og composting sa matag pamilya.

Ipahimo kining compulsory nga proyekto sa matag panimalay    o kaha pag-cluster sa pipila ka balay nga way luna nga kalungagan og para composting aron sila na mismo ang mopadugta sa ilang basura para sa ilang tanom nga utanon ug mga prutas sa palibot   ug di na magpaabot nga hakoton sa garbage truck sa siyudad.