Karong bag-o na ang naglangkob sa mayoriya sa hunta probinsiyal, makapaabot na ba og transparency sa mga transactions nga gisudlan sa Kapitolyo ang katawhan sa probinsiya sa Sugbo? Malikayan na ba ang pagpalit og yuta nga anaa ilawom sa dagat? Kini ang atong mga pangutana.
Ugmang adlawa masuwayan ang naglangkob sa bag-ong mayoriya sa hunta probinsiyal sa probinsiya sa Sugbo tungod kay ilang tukion ang dugang gahin nga gipangayo ni Gobernador Gwendolyn Garcia. Manghinaut lang ko nga ang bag-ong mayoriya mamahimong tigbantay sa mga kahiwian ug dili mamahimong tigbabag sa mga kaayohan para sa ilang katawhan.
Tungod kay bag-o na ang naglangkob sa mayoriya sa hunta probinsiyal makapaabot na ang mga taga probinsiya sa Sugbo og panalipod sa ilang mga interest ug usa na kini ka maayong sinyales nga mapaayo ang pagpadagan ug ang pagdumala sa lalawigan. Dinhi ato nang mapaabot nga aduna nay magkuti-kuti sa mga kontrata nga sudlan sa lalawigan ug sa salapi nga ipagawas sa iyang panudlanan.
Tungod sa bag-ong mayoriya sa hunta probinsiyal atong nakita karon nga ang gipatigbabaw sa mga politiko dili gyod diay ang interest sa katawhan kun dili ang ilang kaugalingong interest. Dinhi atong makita gikan kanila nga ang ilang gipatigbabaw mao ang politics of accommodation. Kaniadto sa dihang silang tanan gawas kang Arleigh kaalyado pa sa gobernadora wala gyod sila magsaba-saba, wala gyod sila mangutingkay ug wala gyod sila magpakisusi kun makaayo ba o makadaut sa probinsiya ang gipangsudlan nga kontrata sa gobernadora. Karon nga kontra na sila sa politika nagsaba-saba na sila, nangutingkay ug nagpakisusi na. Dili diay ni nila mahimo kun sila kauban pa sa partido? Kinsa ba diay ang ilang gipanalipdan, ang interest sa katawhan nga nagbotang kanila sa katungdanan o ang partido nga ilang gisakyan.
Ang gihimo sa mga sakop sa hunta probinsiyal mao ang hinungdan kun nganong nakapalit og yuta ilawom sa dagat ang kagamhanan sa lalawigan.