Ang drugas, drugas ug drugas

Sa dakbayan sa Talisay usa ka batang mao pay pagkakat-on og lakaw ang gilambos sa usa ka adik-adik tungod kay gituohan niya kining alien. Sa dakbayan sa Sugbo adunay walo pa lamang ka tuig nga bata ang gi-hostage sa laing adik-adik tungod kay aduna kunoy mihung-hong kaniya.

Sa lungsod sa Medellin tulo ang gipatay tungod sa ginadiling drugas. Sa dakbayan sa Carcar maghilak ang adlaw kun walay pagpangrakrak nga mahitabo ug gipatay tungod gihapon sa ginadiling drugas. Ning bag-o laing kadugo mismo sa bise mayor sa dakbayan sa Carcar ang nadakpan sa kapolisan tungod sa ginadiling drugas.

Lab-as pa usab sa atong panumdoman ang nahitabo sa nursing student nga gitulis ug gipatay sa mga adik-adik ug ang nahitabo sa inahan nga gipatay sa iyang kaugalingong anak nga adik ug gilubong sulod ra usab sa ilang panimalay sa Barangay Mambaling dakbayan sa Sugbo.

Pipila lamang kini sa dili na maihap ug dili na masukod nga gidaghanon sa mga kaso sa krimin nga mugna ug dunay kalambigitan sa ginadiling drugas. Ingon ani ang epekto sa ginadiling drugas.

Karon, dili gihapon mo magpakabana sa suliran sa ginadiling drugas? Mangiyugpos lang ba gihapon ta sa nakita nato sa atong palibot? Pasagdan lang ba nato ang suliran sa drugas nga mipatay na og daghang kinabuhi ug miguba sa ugma sa ubang mga tawo.   

Kaniadto giingon sa mga otoridad nga 65-70 ka porsiyento sa krimin nga nahitabo sa nasud adunay kalambigitan sa ginadiling drugas. Busa dako gyod unta kaayo ang maiban sa krimin nga nahitabo sa nasud kun ugaling masulbad ang suliran sa ginadiling drugas. Kamo wala moy plano?