Ang Dios Miingon Ang linog, bagyo, baha, gubat, gutom, kamatay

Mura lang og wa, kay ang tawo naanad na niini ilabi na kadtong natawo gikan sa 1900 ug hangtud karong panahona. Sa kasaysayan sa Pilipinas, ang labing kalisud nga nahiagoman sa mga Filipino ug sa tibuok kalibotan mao ra man ang una ug ikaduhang gubat sa kalibotan.

Ang unang gubat sa l914 maoy gubat sa tibuok kalibotan nga gigamitan na og modernong kahimanan sa gubat. May mga eroplano, tangke de gira ug mga armas de fuego, nga gisundan sa ikaduhang gubat sa l939 nga mas moderno na ang mga kahimanan sa gubat itandi sa ginamiton sa unang gubat pangtibuok kalibotan.

Kay sa wa pa ang unang gubat sa kalibotan, ang gigamit sa mga sundawo ug manggugubat kaniadto mao ra man ang espada, bangkaw ug pana. Gani sa panahon ni Goliat ug David, saplong ra may gigamit ni David pagtumba ug pagpatay kang Goliat. Ang silbi nilang tangke de gira kaniadto mao ang gitawag nila og ipo-ipo, samtang ang ilang silbing eroplano mao ang mga kabayo. Pag-abot sa unang gubat sa kalibotan, ginganlan na nila ang mga ipo-ipo nga tangke de gira , samtang ang mga kabayo nga tulin pa sa agila, mao ang mga eroplano. Mao bitaw nga sa pagtagik sa Biblia wala pay terminolohiya nga tangke de gira ug eroplano, busa ang nahisulat ug mabasa mao ra ang pulong ipo-ipo nga mogiok sa kabungtoran ug kapatagan ug mga kabayo nga tulin pa sa agila.

Kay dihang gipasulat sa Dios ang Biblia pinaagi sa sulogoon Niya nga Espiritu Santo sa pagmandar sa mga tawo nga gitahasan sa pagpatik sa mga pulong sa Niya (Dios) sa Biblia, wala pay mga kaalam ang mga tawo kaniadto sama sa kaalam sa mga tawo sa hapit na moduha ka libo ka tuig ang kalibotan human mosaka si Cristo sa langit.

Gani sa panahon ni Noe nakalutaw ang iyang arka sa  iya na lang gayud nga kinabus nga pinsada pero kay giabagan sa Dios aw wa gyud malunod ang arka bisan kargado sa mga nagkalainlaing matang sa mananap uban sa walo ka tawo nga mao si Noe, iyang asawa, tulo ka anak babaye ug tulo niya ka umagad nga lalaki. Ug aron nga makabantay ang tawo nga hapit na mobalik si Cristo sa yuta gipapatik sa Dios sa Biblia nga ang mga timailhan niini mao ang una ug ikaduhang gubat sa kalibotan, nasud batok nasud (sama sa nahitabo karon sa Middle East) gingharian batok gingharian (gingharian sa goberno batok gingharian sa mga rebelde, linog didto linog dinhi, kamatay kagutom ug tanang matang sa kasakit maoy mga timailhan nga dili na madugay moabot na si Cristo.

Apan tungod kay naanad na ang mga tawo niining mga butanga mura lang og wa no.