Hagit ni Oposa

Si Atty. Antonio Oposa, ang Sugbuanong higante sa kalibotanong pakigbisog pagpalambo ug pagpanalipod sa kinaiyahan, dunay awhag sa mga magsisibya sa Sugbo: Magpatabang siya pagpasabot sa katawhan unsa ang kinaiyahan ginamit ang labing yano, labing masabot, labing matinud-anon ug labing makahuloganon nga mga pulong. Kay, nipasabot siya, ang global warming ug climate change langyaw ug hanap ra kaayo, ang kinaiyahan labaw pa. Giluwatan ni Oposa ang awhag atol sa iyang pakigpung human papanumpaa ang bag-ong mga opisyal sa Kapisanan ng mga Brodkaster ng Pilipinas (KBP) Cebu Chapter nga gipangulohan nilang Chairman Marlon Baula sa Manila Broadcasting Co. (MBC) ug Executive Vice Chairman Jun Tagalog sa Vimcontu Broadcasting Corp. (VBC) niadtong Sabado sa gabii.

* * *

Gipakapinan ni Oposa og sugyot ang iyang awhag: Mas makasabot ang kinabag-an sa katawhan, nga maoy mga tigpaminaw ug tigtan-aw sa mga sibyaanan sa radyo ug telebisyon nga sakop sa KBP Cebu Chapter, kun ihulagway sa mga magsisibya ang kinaiyahan sa iyang labing batakan nga kahulogan—sukaranan sa kinabuhi, ang yuta, ang hangin ug ang tubig. Si Oposa, nga nahimong Ramon Magsaysay Awardee (giilang Nobel Prize sa Asya) sa 2009, nipadayag og kasubo nga paminawon lang ang mga pasidaan mahitungod sa kinaiyahan matag human sa dagkong katalagman, nga makalimtan ra sab dayon human sa pila ka adlaw.

* * *

Malaumon si Oposa nga kun puniton sa mga magsisibya ang iyang awhag, mahimong maluwas ang Sugbo, Manila ug ubang bahin sa nasud gikan sa mga pasidaan nga malubong na sa dagat sa mosunod nga mga dekada: Kun makaamgo nang katawhan nga makamatay diay ang pagpabaya, maningkamot sila pagpanalipod sa kinaiyahan; kun makamatngon nga mao diay tinuod nga tinubdan sa kinabuhi, magkugi sila pagpalambo sa kinaiyahan. Nagbilin si Oposa og daghang research materials aron katun-an ug nisaad nga dawaton niya ang gitanyag nga plaque of appreciation unya na sa sunod tuig, kanus-a mobalik siya pagpaningil kun natubag ba sa mga magsisibya ang iyang hagit.

* * *

Mga nasuhito sa pagdaog ni Oposa sa mga kaso sa Korte Suprema pagpanalipod sa kinaiyahan alang sa mga bata ug mga wa pa matawo, paghawan sa Manila Bay ug pagbungkag sa mga sindikato sa ilegal nga pangisda motug-an nimo nga di siya kutob ra sa istorya: Nitanyag siyang mobansay-bansay sa mga sakop sa media sa iyang School of the SEAs (Sea and Earth Advocates) sa Bantayan; ug mangumbinser sa kalibotanong foundations paghatag og dagkong premyo, sa panagtigi nga iyang gisugyot nga pasiugdahan sa KBP, sa mga barangay sa Sugbo nga makalimpiyo ug makapalambo sa ilang nataran. Gipabarug ni Oposa ang tanang magsisibya dayong tapos sa iyang pakigpung ug gipadungan paglitok sa saad paghimo sa ilang tampo alang sa kinaiyahan, bisan unsa kagamay. Atong tan-awon matuman bang ilang panumpa.

* * *

 Email: [email protected]