EDITORYAL - Bug-at ra tinuod ang multa sa way helmet

Sa pagkatinuod kun silot ang tuyo sa goberno hinungdan nga kutob sa masikop nga way helmet multahan og labing menus P1,000, bug-at ra kaayo ning silota ilabina sa mga kabus.

Kay ang tinuod nasud-ong sa mga kabus nga ang maong kantidad dako na kaayo og mahimo kanila sa panahon nga mabuak ang bagol-bagol gumikan sa pagka-way helmet.

Busa angay pagamyan ang maong multa kun nasil-ing sa kagamhanan nga matag sentabo bililhon kaayo sa paghipos sa mga tawong makabsan sa kinabuhi gumikan sa pagka-way helmet.

Ang pagkagusbat sa bagol-bagol sa tawo tungod kay way helmet maoy labing mahinungdanong silot busa di na sila angay pang pabug-atan pinaagi sa pagpamulta kanila og dako.

Maisip man gud sa kadaghanan nga subra ra ang ka madaug-daugon sa kagamhanan pinaagi sa pagmugna niini og balaod nga pamiit sa mga kabus.

Mao bitaw nga ang ubang tawo dali kaayong maputong ilabi  na kun sugnoran sa mga komunistang rebelde ang utok niini ug palaguton pinaagi paghimong isyu sa kamahal sa mga multa nga ipahamtang sa goberno sa panahong di makatuman sa balaod ang tawo sama ning helmet law.

Kun ang mga edukadong tawo mapungot sa kamahal sa multa nga ipabayad kutob sa way helmet, o kun may helmet man di mosakar sa gipangayo nga kalidad ug brand sa DTI, daw unsa pa kaha ang mga menus og grado unya kabus pa.

Inigsugnod niini og bulatik sa mga komunista, mura sab og silaban og kayo ang lubot niini nga morakrak dayon batok sa goberno hangtud nga mouban na siya sa mga kalihokan sa mga rebelde ug bugal-bugalan na ang goberno.

Mao nga angay tun-an pag-ayo sa mga magbabalaod kun mogama sila og balaod aron nga di   maisip sa mga kabus nga pagbugal-bugal kini kanila.

Wa man magkinahanglang modaghan ang kuwarta sa goberno niining multaha ba, kay ang tinuod sila ang angay hatagan og tabang sa panahon nga mabalbag ang ilang ulo gumikan sa pagka-way helmet.