EDITORYAL - Mga kongresista bahag ang ikog

Puwerti kunong daghanang mga kongresista nga pabor sa RH Bill nga mibahag ang ikog sa kahadlok sa bahad sa mga pari nga di sila pabotohan sa mga botanteng Katoliko sa umaabot nga election sa tuig 2013.

Kadto kunong mga magbabalaod nga vocal kaayo o kusog kaayo mowaldas pabor sa RH Bill sa pagkakaron mitak-om na ang baba kay puwerting daghana kunong espiya nga gipakatap sa kaparian sa kongreso nga molista niadtong mga kongresista nga sipa kaayo og depensa pabor sa pagpalabang sa RH Bill.

Gumikan niini tataw nga mosaler ang bandilyo sa kaparian nga di gyud pabotohan ang mga magbabalaod nga moendosar sa RH Bill aron hingpit nga mahimong balaod. Kay kutob sa mga moboto niini pabor silotan sa kaparian   pinaagi sa dili pagbotar kanila sa adlaw sa piniliay.

Kumo kay may gahum ang tingog sa mga pari, kutob sa mga tawong ilang walihan ug kampanyahan nga di pabotohan ang mga kandidato nga moendosar sa RH Bill pagkahimong balaod, motuo ug mosanong kini kanila.

Ang RH Bill gikahadlokan sa kaparian nga kun mahimong balaod mokusog ang abortion ug makasapi ang daghang mga magbabalaod gikan sa mga pabrika sa kondom, ug mga pildoras nga gamitonon   sa family planning.

Kay ang RH Bill gud mopadasig man sa magtiayon nga magplano sa pamilya aron nga di kaayo magka-muritseng ang pagpuyo. Apan ang pagsabot niini sa kaparian mao nga aron mapugos ang magtiayon pagpaminus sa panganak pitlokon na lang niini ug patyon ang ilang anak sulod sa tiyan sa inahan aron di matawo.

Sa kadaghan nang relihiyosa nga babaye karong panahona di tingale angay silang kuhaan sa kabuot nga mobakyaw sa kaugalingon nilang kamot pagpatay sa kaugalingon nilang anak. Sa labing ulahi nga survey sa NSO nga mao ang family health survey (FHS) nasuta nga ang palaanak mao ang mga babayeng kabus ug kuwang sa edukasyon itandi sa mga babayeng maarang-arang og kahimtang ug may hustong edukasyon.

Kay buot bang ipasabot ang mga edukadong babaye ug may ikasarang sa panginabuhi mipuo sa ilang mga anak sa tiyan aron pagtuman sa family planning?   Di   ba?