Brgy Canjulao, Lapulapu City

   “Daghan kaayo mga traysikad sa among lugar nga mga bata pa kaayo ang mga driver unya wa gyoy mga disiplina kay magpataka lang og padagan bisag daghang mga tricycle, kuyawan mi mosakay kay delikado kaayo.”

Brgy Langtad, Naga City

“Diri sa among lugar naay kurbadahon nga karsada nga delikado kaayo kay wa gyu’y suga ngitngit kaayo panahon sa kagabhion daghan na kaayo ang nadisgrasya hapit kada semana naa gyu’y mabalita nga disgrasya diring dapita.”

Brgy South Poblacion, San Fernando, Cebu

“Kusog kaayo ang masiao diri nga wa gyud mabadlong sa mga opisyal sa barangay ug kapolisan among nahibaw-an Sir nga mura’g naay konsehal nga maoy nagpadagan ani nga sugal diri hinungdan nga wa gyud masulbad.”

Brgy Sima, Dumanjug, Cebu

“Kusog kaayo ang illegal nga drugas nibalik ni diri unya ang supplier kay ilado ra pero wa gyu’y nakapadakop aning tawhana, kada Sabado sa gabii ni himuon ang pagpalusot sa shabu.”

Brgy Dumalan, Dalaguete, Cebu

“Sa sitio Canlawilao kay nahimo naman hinuong estambayanan ang health center usahay kay himuon man ganing inumanan sa ubang mga estambay naa man untay konsehal nga nagpuyo sa duol pero wa man kabadlong.”

Brgy Cogon, Cordova, Cebu

“Mangayo unta mi’g tabang unsaon pagsulbad aning among problema sa tubig kay ang agas sa gripo mawagtang man pirmi matag alas 3 sa kaadlawon unya sige’g paumento sa bayranan.”

Brgy Nug-As, Alcoy, Cebu

“Ang among mga opisyal sa barangay kay way klaro sige lang og saad nga pabutangan og linya sa kuryente labi na sa sitio Lingatong pero hangtod karon wala pa gihapon lihoka mantinil lang mig gamit og lamparilya.”

Brgy Mactan, Lapulapu City

“Ako lang reklamo Sir kay ang among barangay hall kay way gamit kun maglukat mi’g barangay clearance mangita pa mig konsehal nga mopirma usahay adtoon pa namo’g balay para magpapirma mahal ra ba kaayo’g bayad.”

Brgy Vito, Barili, Cebu

“Naunsa naman ning among karsada nga wa man gyud tagda sa mga opisyal pagpasemento kuyaw kaayo sa mga disgrasya labi na kun padung kag Kanyabogon pwerte na kalibaongon, asa naman diay ang budget para ani?"

Brgy Basdiot, Moalboal, Cebu

"Daghan pa man gihapon namaligya’g illegal nga drugas diri sa among barangay daghan na kaayo usahay klaro pa gyud kaayo nga mga magsuyop bisan naay mga bata makakita  wa may aksyon nga among nabantayan.”

Brgy T Padilla, Cebu City

“Nanghinaut mi Sir nga molihok na unta ang among mga opisyal nga sulbaron ang problema sa lunop kun mag-uwan kay mga basura adto man padung sa kanal nga ilabay sa ubang mga tawo.”

Brgy Tayud, Liloan, Cebu

"Sa sitio Kawayan kay kusog gihapon kaayo shabu daghan na kaayo ang namaligya diri unya naay balay diri nga himoon nilang suyopanan hapit gud kada-adlaw namo sila mabantayan nga magsuyop.”

* * *

Alanga sa inyong mga reklamo text lang sa 09071678643