Mantalongon

Wala mahupas sukad pa kaniadto ang baligyaanan ug kan-anan sa Tulay, Minglanilla. Lugar nga hugopanan ilabina sa adlaw’ng Sabado ug Domingo kay nabantog sa lab-as ug preskong mga seafood. Mga vendor nabulahan apan kadtong ulahi nga gustong mamaligya lisud-lisoron, babagan ug pangigihan sa mga nag-una sa pwesto. Angay usab unta sila nga hatagan bisan gamay’ng luna kay dili baya puthaw ang ilang tinai. Nagkinahanglan og panginabuhi ang tiyan nga gikotoy. Sama ba didto sa Santander ug ubang kalungsoran nga daghang talipapas o satellite market agi’g paghatag og luna nga kapanginabuhian sa mga vendor.

* * *

Nahibalik na ang pagsalig sa mga vendor, manumoray ug mga negosyante sa karaang tumoranan sa Papan, Sibonga ug Mantalongon, Barili matag Huwebes. Diha man goy panahon nga mikunop ang gidaghanon sa mga manabo gumikan sa mga tulis nga nahitabo. Mibalik na ang kaalegre sa tabo kay namintinar na ang kahapsay, kalinaw ug napakgang na ang bisan unsang krimen tungod sa panagtambayayong sa kapolisan ug sa hingtungdang lungsod. Ang gipalambo nga taboan sa Papan ug Mantalongon maoy gisaligan sa gatosan ka mga mag-uuma ug mga vendor nga maoy tumoranan sa nagkalain-laing produkto sa umahan lakip na ang mga hayopan.

* * *

Bisan dako’g natampo sa panudlanan sa Mandaue ang bag-ong merkado apan duna gihapoy mga vendor nga nagping-it sa ilang bayranan sa stall rental matag bulan. Niadtong Nov. 8, 2011 mihangyo sila og lugway sa ilang bayranan kutob sa Enero 8, 2012. Daghan gihapon nga wala makatuman sa pagbayad hinungdan nga nangayo og laing lugway. Duha ang rason nga nagkalisod ang mga vendor. Una, dakong kantidad ang ilang nabayad sa lease right aron makapanag-iya og pwesto. Ikaduha, naapektahan gihapon ang ilang halin kay tua pa may namaligya sa daang merkado. Maglisod paghingilin ang kagamhanan sa Mandaue sa mga vendor nga naa sa gawas sa daang merkado kay naa man mag-okupar sa pribadong luna nga ang baligya sama ra gihapon sa gibaligya sa bag-ong market.

* * *

Si konsehal Jimmy Lumapas nga maoy Chairman sa Committee on Market and Abbatoir sa Mandaue misanong sa hangyo sa mga vendor nga kahatagan sila’g moratorium sa ilang bayranan sa abangan sa stall gikan sa Enero 8, 2012 ngadto sa Enero 2013 aron maulian ang ilang kinitaan. Duna nay ordinansa si Lumapas sa maong katuyoan. Sanglit dili man madali pagpalabang ang maong balaod, iyang gisuportahan og resolusyon nga naghangyo sa market administration nga iangan-angan una ang pagpaningil sa bayranan agig pagsabot sa inagulo sa nagkalisod nga kahimtang pinansyal sa mga vendor.

([email protected]/0906-648-9637)