Mga badlongon

Pastilan, duna man diay mga polis ug pipila ka deputized agents sa Land Transportation Office nga gitangtang na sa ilang katungdanan nga kaabag sa LTO apan wala mouli sa Temporary Operators Permit (TOP) nga giisyu kanila.

Kining mao nga mga TOP nga wala nila iuli, maoy gigamit nila sa binuang. Usa ka higala nako mitug-an nga ang iyang amigo gidakop sa usa ka polis sa Mabolo unya buot nga pangwartahon.

Pastilang batia niining maong report. Mao kini ang rason nga misulod ko pagka deputized agent sa LTO kay aron ipakita nako nga mas respitado ka sa mga drayber kun dili ka mangwarta.

Awhagon usab nako ang kadagkoan sa LTO nga kun adunay mga polis nga wala na nila gideputized unya wala mouli sa nahabilin niya nga TOP, gukda pinaagi sa pagpasaka og reklamo didto sa ilang opisina. Makakwarta g'yud tinuod sila kun magbinuang kay kinsa may dili mobayad kun kilkilan nila nga mahal man ang multa kun masakmit ang lisensya.

Ang akong higala mitug-an nga ang ubang modus niining mao nga mga kanhi LTO deputized agent nga polis, pakita-kitaon ra nila og TOP ang drayber. Natural mohatag g'yud kun makasabut nga buot ra sila nga mangwarta.

* * *

Sa among operation sa LTO-Task Force Alpha didto sa Lahug, dunay usa ka babaye nga gipara namo kay depektoso ang suga sa atubangan.

Dayon expire ang rehestro sa sakyanan. Dili niya ihatag ang iyang license kay international license kuno. Miinsister man g'yud ko pinaagi sa kalma nga pagkasulti.

Abi ninyo og unsay gihimo sa babaye? Mikuot sa pitaka og tibuok usa ka libo ka pesos ug gitunol nako. Ako siya nga gipasabot nga kami sa Task Force Alpha dili ingon niana ang batasan.

Giingnan ko niya nga ingon ana gayud ang iyang mga madunggan sa mga road law enforcers dinhi sa Pilipinas. Dihang ako nga giingnan nga duna pay nagtinarong, nangayo siya'g pasaylo.  

* * *

Ang pahibalo ni magpapatigayon Jonathan "Atan" Guardo nga mosuporta siya ni Kongresista Tomas R. Osmeña sa pagpapili niini sa pagka mayor sa eleksyon karong sunod tuig, usa ka nindot nga kalamboan sa politika. Pastilan gayud kining politika. Kaniadto, kontra sila si Guardo ug si Tommy apan karon higala na usab sila. Wala makapugong si Tommy sa pagpahiyom dihang gianunsyo ni Guardo nga "Type O" na siya.

Ang gipaabot nako nga si Joel Garganera mosuporta na usab ni Tommy. Pero mora'g layo ra kini sa tinuod kay ang-ang man og biyaan ni Joel ang iyang suod nga higala si Mary Ann de los Santos.

Nindot unta kadto kun si Guardo iapil ni Tommy sa slate pagka konsehal sa south district. Sigurado gayud nga daug si Guardo.

Kining mao nga kalamboan sa politika dinhi sa dakbayan, dili kini angay'ng kompyansahan ni Mayor Michael Rama. Kun dili mag-inabtik si Rama, malagmit nga alkansehon siya.

Mosamot nga alegre gayud kaayo ang eleksyon dinhi sa dakbayan sunod tuig.