Walay hinungdan nga kaguol ni Caberte

Naguol ang Department of Trade and Industry (DTI) sa report nga pagkuyanap sa peke nga sticker sa helmet.

Si DTI-7 regional director Asteria Caberte nagkanayon nga hangtod niadtong miaging adlaw, nakapapilit lamang sila og 7,000 ka mga sticker bisan sa record sa Land Transportation Office adunay 321,560 ka mga rehistradong motorsiklo sa rehiyon siete.

Ambot unsay gibasehan ni Caberte sa iyang kaguol, ug nakakita na ba kaha si Caberte og kopya sa peke nga sticker?

Kun ibase sa gidaghanon sa rehistradong motorsiklo, maka-alarma ang gidaghanon sa wala magpapilit og sticker. Tiaw mo na sa 321,560, wala gani maka-1/4 lamang ang gidaghanon sa nagpapilit.

Maayo tingaleng masayod si Caberte nga dili ingon kasayon ang pagduaw sa iyang buhatan aron mosunod sa estupido nga balaod sa helmet – balaod nga gihimo lang panguwarta sa gobyerno ug sa pipila nga anaa sa gobyerno.

Maka-usa gituyoan nako og katkat ang buhatan sa DTI-7, walay dili makayawyaw sa kataas sa linya sa ngi-ob ug alimu-ot nga regional office sa DTI-7. Ang mga motoristang magpapilit nangaligo sa singot, samtang ang mga kawani sa DTI nga nagpapilit hayahay sa aircon nga opisina.

Igo lang untang magpapilit og sticker pero hilabihang kakuti sa proseso sa DTI unya may bayad pa gyud nga kapin sa P100 bisan aduna nay budget nga gitagana ang gobyerno alang sa sticker.

Kinsa may motorista nga mosunod sa balaod kun ang pagsunod sa binuang nga balaod sa helmet mohatag og kalangay, gasto ug walay sama nga kahago? Si Caberte dili mobati sa kapait sa mga motoristang gustong mosunod sa inamaw nga helmet law tungod sa iyang hayahay nga sitwasyon sa iyang aircon nga opisina.

Nagtuo ko nga kun ipugos sa LTO ang pag-estrikto sa pagpatuman sa helmet law sa mosunod nga bulan dakong gubot ang mahitabo tungod sa “defiance” sa ubang mga motorista.

Kay gawas nga nakita nila nga binuang ug panguwarta lang ang pag-estrikto sa sticker, dili kini makahatag og “seguridad” kun ang LTO ug Land Transportation Franchising and Regulatory Board (LTFRB) dili mo-estrikto sa paglimpyo sa lista sa mga badlongong drayber nga maoy kasagarang hinungdan sa mga disgrasya sa karsada ug pagkawala sa kinabuhi ug kabtangan.

Apan bisan pa tingale og mosukol ang katawhan, ipugos kini kun tinuod ang taho nga ang sticker sa helmet gihimong “fund-raising” alang sa dakong politiko nga gustong mag-presidente sa 2016.