Sagpa sa sapa

Sa miaging semana, nabutang ang Sugbo sa mapa sa kalibutan dihang napili sa Leisure magazine nga usa sa labing nindot nga waterfalls ang Kawasan sa lungsod sa Badian. Usa ka dakong garbo ang maong pasidungog tungod kay dili yanong mga waterfalls ang nalakip sa talaan sa labing nindot sa kalibutan.   Lakip sa napu ka mga nindot nga waterfalls gikan sa Brazil, America, Switzerland ug uban pang mga nasud.   Dakong bintaha ang mabutang sa maong magazine tungod kay libre ni nga promosyon alang sa turismo sa Sugbo ug sa nasud.

Kung unsa ka dako sa budget sa promosyon ang gigahin sa ubang mga nasud alang sa ilang turismo, libre nga naangkon sa Sugbo ang pagpili sa Kawasan nga labing nindot nga waterfalls sa kalibutan.   Direktang mabasa sa mga turista ug mga travel agency ang maong magazine nga nahimong giya unsay mga nindot nga lugar nga kinahanglan nga bisitahon. Tungod kay adunay integridad, sagad sa mga turista sa kalibutan, mosunod sa unsay gi-indorso sa mga travel magazine. Mabutang sa dakong bintaha ang Sugbo tungod kay wa’ na kinahanglana ang gasto aron lang mabantog ang usa ka Kawasan falls ug mabisita sa mga lokal ug langyaw nga turista.

Apan human sa usa ka semana sa paggawas sa talaan sa labing nindot nga waterfalls sa kalibutan, dili maayong balita ang nitumaw pipila ka kilometro sa dili pa sa lungsod sa Badian diin nahimutang ang Kawasan falls. Daghan ang nakugang sa kalit nga pag-uga sa tubig sa Mantayupan falls sa lungsod sa Barili. Nagsunod ang pag-uga sa tubig sa sapa sa Mantayupan sa taas nga bahin sa waterfalls nga maoy hinungdan nga wa’ nay nidagaydagay nga tubig paingon sa waterfalls. Giingon nga usa ka dakong lungag ang nitumaw sa sapa ug gisuyop ang tubig paingon sa ubos. Gitabunan na sa lokal nga kagamhanan sa Barili ang lungag aron mobalik ang tubig sa sapa.

Daghan ang nabalaka samtang ang uban gipaagi lang katawa ang maong insidente. Talagsaon ang maong hitabo ug dili angayan nga ibaliwa’ na lang. Giingong resulta sa quarry sa ubos nga bahin sa sapa ang kalit nga paghulpa sa tubig nga maoy nakaingon nga gisuyop ang tubig paingon sa ubos. Nganong nisangpot pa man sa maong insidente ang tanan? Wa’ ba diay mabadlong ang mga tawo nga nanguykoy og ba’s ug bato sa maong lugar aron unta kalikayan ang maong insidente? Nganong nahatagan man og pagtugot ang mga tawo nga mag-quarry sa maong lugar? Ug kung wa’y pagtugot ngano man nga wa’ mabadlong ang maong quarry aron hingpit nga maundang ang negosyo sa maong dapit?

Kung gidayeg sa usa ka magazine ang Kawasan falls, gidayeg ‘sab sa mga Sugbuanon ug mga turista ang Mantayupan falls tungod sa kanindot ini ug kaduol sa maong dapit gikan sa sentro sa lungsod sa Barili. Apan ang nahitabo karon, wa’ pa gani hingpit mahatagi og tukmang promosyon nakasugat na og isyu ang maong waterfalls ug nabutang sa dakong kwestyon gi-unsa sa mga Sugbuanon sa pagpanalipod ang kinaiyahan ug ang mga gasa niini. Kung nakalibot ka sa nasud, aduna pay mas nindot nga waterfalls sa Kawasan nga nakadawat og pagdayeg sa usa ka travel magazine niining bag-o. Apan ang dakong pangutana, pila ka mga waterfalls ba ang nabutang sa dakong hulga tungod kay gi-among-amongan ang palibot niini?

Samtang gipasalamatan ang usa ka international magazine sa pasidungog nga nahatag sa Kawasan falls, aduna ni mas lawom nga hagit sa tanan. Kung nitumaw ang problema sa Mantayupan ug nalatid ang garbo sa Kawasan falls, hagit ang bilin sa duha ka managlahing anggulo sa waterfalls sa Sugbo ug nasud--- ang pagpanalipod sa natural nga mga talan-awon nga dakong gasa sa kinaiyahan.

Email: [email protected] or [email protected]