Vendor nga walay pwesto

Wala’y kuyaw sa demolisyon ang mga naninda’g trapo, newspaper, tubig, ice cream, ice candy, buko bar ug uban pang baligya nga ilang isuroy. Mga vendor nga walay puwesto apan silay tag-iya sa kadalanan. Dili dakpon sa mga traffic enforcer bisan og molagbas sa karsada. Ulan ug init ilang gisagubang bisan ginagmay ang ginansya basta lamang makapalit og bugas. Ang uban nag-usher aron mahalinan og numero sa masiao dalang tago-tago aron dili madakpan sa mga polis. Daghan sab hinoong polis nga motaya o mopatad og numero. Natakdan sa pamasin.

*   *   *

Dunay mga vendor nga peligro sa aksidente apan misuong sa maong panginabuhi aron mabuhi. Kini sila mokapyot sa mga sakyanan aron mamaligya og ampao, chicharon, bukarilyo, prutas, mani, tubig, itlog ug uban pa. Ang uban manaka sa nagparking nga mga sakyanan sa mga terminal aron pagserbisyo ngadto sa mga pasahero. Sa Carcar makalingaw ang mga vendor. Sila moingon, “itlog mo noy, orange; itlog mo noy, ukban”. He he.

*   *   *

Adunay mga vendor nga maayo kaayong mobulatik sa mga tawo. Namaligya’g tambal ug ibandilyo nga epektibo. Mga gamot nga kahibulongan nga gihumolan og lana. Hinuon dili makahilo kay dili man sab imnon kay para ra man haplas. Daghang motuo ilabina’g magsambilay og bitin nunot sa lanog nga trumpa. Daghang motuo kay mora’g announcer sa radyo. Pastilan tuod kining panginabuhi. Nag-ingon man god ang Ginoo, “lihok tawo kay tabangan ko ikaw”. Basta dili lang sagolan og binoang. Ayaw lang tong namaligya’g kandila nga linibo ang presyo kay giingong milagroso. Nadakpan hinoon kay nangilad.

*   *   *

Dalaygong panginabuhi ang pagka-vendor kaysa mangilad ug manulis. Sa tulonghaan naay naninda’g pagkaon ug mga dulaan. Sa simbahan naay naninda’g kandila, bulak, agnos, libreta ug mga balaang imahen. Sa mga sidewalk nagklasi-klasi ang ilang mga tinda. Sila ang mga vendor nga kanunay’ng matandog sa hulga sa demolisyon.

*   *   *

Demolison ang tanang namaligya sa palibot sa Taboan, San Nicolas kadtong nag-okupar sa gitawag og module. Kuralon ang maong merkado ug ang naninda sa gawas ibalhin na sa sulod aron adto na ang tanang mangompra. Masulbad ba kaha sa kagamhanan sa siyudad ang mga nagpuyo sa Taboan nga anha na gani mangatulog ilabina sa portion nga gitawag og langob.

*   *   *

Kinsa may mabasol sa pagbanaw sa hugaw nga tubig sa isdaan sa merkado sa Mandaue nga nakaminos sa halin. Ang mga vendor mipasangil nga dili maayong pagkatrabaho ang drainage nga nabara ang pag-agay-ay sa tubig. Samtang ang market administrator misumbalik pagtumbok ngadto sa mga vendor nga nagpasagad lang og huwad sa ilang hugaw hinungdan nga misuyla ang ilang pwesto. ([email protected]/0906-648-9637)