Konsehal financier sa masiao?
Unsay nahitabo sa kampanya sa kapolisan batok sa illegal nga sugal? Nganong hangtud karon padayon ang pagkuyanap sa masiao ug sa illegal swertres?
Mismong ang acting manager sa PCSO dinhi sa Visayas ug Mindanao nga si Federico Damole mitug-an nga daghan sila og kasayuran nga nadawat sa operasyon sa illegal swertres. Usa niini ang operasyon diha sa usa ka illegal swertres outlet diha sa may Arellano Boulevard.
Apan samtang iyang giangkon nga nakahibawo na sila sa operasyon niini, nganong hangtud ron wala pa man mahunong ang maong illegal nga kalihukan? Ang nakadaot kay nahimutang ang maong outlet dili layo sa Waterfront Police Station.
Unsay buot ipasabot niini? Nangatulog sa ilang trabaho ang kapolisan o dunay nakasapi nila hinungdan nga gipasagdan ang operasyon sa illegal swertres duol sa ilang nataran. Aron paglikay sa pagtahap nga nagdawat og payola ang kapolisan gikan sa mga operator og illegal nga sugal angayang ilang banhawon ang kampanya batok niini.
Maayong sugdan nila ang kampanya gikan sa mga namaligya og tip sheets ingon man ang mga nag-imprinta niini. Dinhi sa dakbayan sa Sugbo dunay ordinansa nga nagdili sa pag-imprinta og tip sheets apan pakyas ang kapolisan pagpahunong sa operasyon sa maong printing press.
Kadaghan na gironda sa kapolisan ang maong printing press apan mibalik lang kini gihapon sa ilang operasyon. Gikinahanglan tingali ang abag sa City Hall niini. Dili kaha maayong bawion sa dakbayan ang business permit niini kun masakpang nagpadayon pagpangimprinta og tip sheets?
* * *
Didto sa lungsod sa Argao daghan ang report nga akong nadawat nga ang nagpasiugda sa masiao usa ka opisyal sa lungsod ug usa ka opisyal sa barangay. Ambot nganong wala mabadlong sa kapolisan sa Argao ang maong konsehal nga gikatahong nagpaluyo sa pagkuyanap sa illegal nga sugal.
Kun mahadlok ang kapolisan sa Argao sanglit konsehal lagi sa lungsod ang maayong buhaton nila mao ang pagtug-an niini ngadto sa Department of the Interior and Local Government. O ba kaha sa mayor aron mapitol ang mga opisyal nga nagpasiugda og illegal.
Attention Mayor Edsel Galeos kun epektibo ang imong kampanya sa pagpanglimpiyo sa tugkaran, hinaut imong ilakip sa pagpanglimpiyo ang mga opisyal nga nalambigit sa illegal nga sugal. Sigurado kong nakaila ka kinsay konsehal nga akong gipasabot tungod kay matud pa public knowledge na diha sa lungsod ang negosyo ni konsehal ug sa iyang kapikas nga usa ka opisyal sa barangay.
Laing angayang badlongon ni Mayor Galeos mao ang giingong pagpanghatag og numero sa masiao sa usa ka FM radio station nga nagbasi diha sa iyang lungsod. Ang nakapait pa gyud kay usa sa mga giingong nanghatag og numero matud pa sa akong tinubdan nga mao mismo ang kawani sa lungsod nga gitugyanan sa mayor paglingkod sa oras nga giingong gibayran sa lungsod diha sa maong radio station. Kun wala masayod si Mayor Galeos niini, palihog ko og pitol nianang maong kawani mayor tungod kay naghatag na og dakong kauwawan sa imong bansagon ug sa mga Argaoanon.
* * *
- Latest
- Trending
