EDITORYAL - Life Planning Course pugong sa hikog

May usa ka magbabalaod nga miumol niining Life Planning Course aron mapugngan ang paghikog sa mga batan-on nga nagtungha o kaha sa mga hamtong nga mawad-an na og paglaum ning kinabuhi.

Ang puntariya niining balaora mao kadtong nagtungha sa elementarya ug sekondarya kinsa dali kaayong makabsan sa maayong pinsada kun duawon na sa dagkong suliran.

Sa pagkatinuod gikinahanglan kaayo kini aron kadtong makahunahuna sa paghikog dili mahinayon.

Kasagaran sa makapahikog sa tawo babaye ug lalaki mao ang kapakyas sa gugma, kadako sa utang, gibuwagan sa asawa, bana ug uyab, kauwaw ug uban pa.

Apan gawas lamang kun maabnormal ang utok sa tawo gumikan sa drugas o uban pang hinungdan, ang mga pahinumdom gikan sa eskuylahan dako kaayo og ikatampo kun ugaling duawon na ang tawo sa hilabihan kabug-at sa problema.

Ang usa ka tawo nga mawad-an na og paglaum ning kinabuhia gumikan sa bug-at nga problema, usahay di na maminaw og mga tambag gikan sa ginikanan , igsoon, mga higala ug ubang tawo.

Hinuon kun sa ilang paghinuktok una maghikog makahinumdom sila sa ilang mga nadungog nga leksyon sa eskuylahan pinaagi sa life planning course basin baya tinuod nga makatabang kini sa pagsanta kanila. 

Kay sa maong kurso ipagamit man ang mga batid nga psychologist, nga espesyalistang doktor ug uban pang may igong kasinatian bahin sa dagan sa hunahuna sa tawo. Sa Biblia yano kaayo ang pangutana   sa Dios nga nagkanayon, "Kay makapataas ba sa kinabuhi ang kaguol?

Tungod kay tawo ta ug di hayop, wa na magdaghan og eksplikar ang Dios,   kay Siya nasayud nga sa maong pangutana ang tawo nga may igong salabotan makasabot nga di maayo ang magpadaog sa kaguol.

Busa gusto sa Dios nga isug ang tawo sa pagsukol sa problema, kay alang Kaniya ang paghikog usa ka tinalawan ug ang mga talawan Iyang silotan sa impiyerno sa pagbalik ni Kristo. Di ba?