Lunop-baha! Grabe!

Gitug-anan ko ni Alvin Santillana sa hinungdan kun ngano nga magbaha diha sa karsada nga nahimutang kilid nga bahin sa Aderan Hotel lahus na sa Salinas Drive sa Barangay Lahug.

Si Santillana nga maoy operations officer sa Cebu City Disaster Risk-Reduction and Management Office mitug-an nga ang sayop kay ang tubig nga gikan sa Sitio Sun-ok ug Laguerta wala mopaingon sa Lahug River. Angay diay tuod nga ang tubig-baha nga gikan sa duha ka sityo sa Lahug himoan og dakung kanal aron adto kini moagus sa Lahug River, dili kay adto ipapunta sa karsada nga nahimutang anang merkado kilid sa Aderan Hotel.

Sayonan ka nga dihang mibunok ang uwan kaniadtong Domingo sa gabii, nagpaingon ko nga mopauli sa akong payag atbang sa Marco Polo Hotel, nasugatan nako ang bul-og sa tubig-baha. Kaingon nako og mabanlas ang akong gisakyan sa kakusog sa baha. Napugos ko pagliko paingon sa Camp Lapulapu ug didto na mitungas sa karsada direkta sa tungasan nga bahin paingon sa Marco Polo.

Grabeha uy. Sulbara tawon na ninyo mga engineer sa dakbayan. Kini ra ba’ng amiga nako nga si City Engineer Kenneth Carmelita Enriquez dili gayud motubag kun imo nga tawgon aron pakighinabian sa iyang trabaho. Mas maayo na lang kay andam kanunay si Assistant City Engineer June Nadine Sison nga motubag. Apan ang nakalahi kay dili matubag ni Engr. Nadine ang tanan nga pangutana kay dili man gayud siya ang city engineer.

Pwerteng kusuga sa baha nga gikan sa Sitio Sun-ok ug Laguerta. Gawas sa baha, duna pay pakapin nga mga sinako nga basura nga ipaanod sa mga walay buot nga lumulopyo nga wala maghuna-huna unsay epekto sa ilang gibuhat. 

Dili kini engineer si Santillana apan nakasabot ko nga nasayran niya ang hinungdan sa baha diha kay gitun-an man niya ang maong sitwasyon dili sama sa ubang mga engineer nga maayo lang pagpahayahay.

* * *

Ang pagpanghatag og life jackets ngadto sa mga lumulopyo sa lupa nga bahin dinhi sa dakbayan aron dili sila malumos kun motubo ang tubig atul sa kusug nga uwan, maayo man.

Apan ang nindot gayud nga buhaton sa dakbayan mao nga papahawaon nila kadtong mga tawo nga maoy nakapagamay sa sapa. Sayonan ka nga gituyo nila pagpagamay ang sapa.

Asa man nila paagia ang tubig nga hapit na man lang nila sirad-an ang sapa? Unya kamo nga mga tawo nga nagpuyo sa tukma nga dapit, nganong wala man ninyo badlonga kining maong mga tawo dihang gihimo nila ang binuang?

Sa laktud, kamo ra usab ang mabasol kay gipasagdan ra ninyo ang binuang sa inyong mga silingan. Espoko mo nga matud ni Mayor Michael Rama nga lapad kaayo ang Lahing-lahing Creek kaniadto apan karon mora na lang og kanal. Natural nga maglunop gayud ang maong lugar kay gamay na man lang ang agianan sa tubig. Mora’g gituyo ninyo nga lunopan ang inyong dapit. Alang ni Mayor Rama, hala, panggub-a ang maong mga balay nga nag-ali sa tubig.

Ang nakadaut lang kay matud ni Rama nangahadlok na ang iyang mga sakop nga mangguba sa kabalayan, apil na si Alvin Santillana. Ngano gud tawon nga mahadlok mo nga kanunay man mo nga nagtakin-takin og armas?

Ingon si Alvin nga wala siya mahadlok, apan si Mayor Rama ang mibutyag niini. Kun wala mo mangahadlok, namolitika mo kay kun mangguba mo karon, walay mobotar sa Team Rama sa eleksyon karong sunod tuig.