Umahan sa mga vendor

Tubag sa nagsaka nga populasyon ang pagbag-o ug ang pagpalapad sa merkado. Kasagaran god maghuot ang mga vendor ilabina kun ang merkado anaa mahimutang sa kinapusoran sa siyudad ug lungsod. Apan angay’ng huna-hunaon sa mga opisyal nga walay mawani sa panginabuhi sa higayon nga tukuron o bag-ohon ang ilang merkado. Ang merkado maisip nga umahan sa mga vendor. Ang luna sa bag-ong merkado sa Jubay, Liloan gidonar sa Ramon Aboitiz Foundation, Inc. (RAFI) ug sa pamilyang Frasco. Gitawag og Panphil Frasco Public Market migasto og P47M nga giabagan ubos sa financial assistance ni kanhi Pres. Erap Estrada nga giinugurahan niadtong Agosto 21, 2011. Mao diay nga si Mayor Duke Frasco mao ray wala magpasakop sa Bakud Party sa 5th district kay maikog sa dakong tabang ni Estrada alang sa mga vendor.

*   *   *

Ang gikusogang tinap-anang isda sa Danao gipahiluna na sa Macapagal-Durano Fishport. Wala na sa kadaplinan ang mga vendor ug tua na sa fishport mamaligya sa kinaham nga tinap-anan, panga, kusahos, lambay ug pasayan. Mao nay fish trading center sa amihanan sa lalawigan ug dili na ilahos pagtumod sa Pasil, siyudad sa Sugbo. Gawas sa modernong merkado sa Danao ang ilang fishport giinugurahan niadtong Okt. 22, 2008 nga migasto og P86.4M gikan sa social fund ni kanhi Pres. Gloria Arroyo inabagan sa Phil. Fisheries & Development Authority ug sa kagamhanan sa Danao. Sa pikas nga matang sa panginabuhi nagpabilin gihapon ang tago-tago nga pagpanindag paltik nga armas. Kini god ang Danao maoy dapit nga nabantog sa industriya sa tiggama’g armas. Bisan pa man gi-legalisar kini niadtong 1990’s pinaagi sa katukoran sa Workers League of Danao Multi-purpose Cooperative (WORLD MPC) sa Dungguan, Danao.

*   *   *

Samtang gubot ang ubang merkado apan hamugaway’ng nakapahimulos ang mga vendor sa Libertad, Bogo City nga giinugurahan niadtong Marso 15, 2012 nga gigastohan pinaagi sa utang sa Development Bank of the Phil. (DBP). Nahiluna na usab ang mga vendor sa Naga nga gitawag og Naga City People’s Mall nga pormal nga gibuksan niadtong Mayo 20, 2011. Sa Toledo City dagko’g halin ang vendor didto kay ang ilang merkado duol man sa Ferry terminal ug Roro port nga dunay magbiyahian Cebu-San Carlos, Negros Occ. Ang uban tua mamaligya sa DAS, Lutopan ug Matab-ang public market.

*   *   *

Gipaabot nga supakon sa mga vendor ang tukoron nga bag-ong merkado sa Lapu-lapu City . Layo alang kanila kay anha tukoron sa barangay Gun-ob duol sa Hoopsdome. Sa pagkakaron, apiki ang daang merkado ilabina nga gilibotan sa daghang negosyo isip business center. Ang Lapu-lapu nagbaton og dos andanas nga merkado. Sa ibabaw maoy baligyaanan og isda, karne, utanon ug ubang pagkaon. Sa silong anaa ang lain-laing panginabuhi sa mga vendor.

*   *   *

Naila gihapon ang Taboan sa San Nicolas nga pasalubong center. Matag karon ug unya naa gyuy modalikyat nga mga turista ug ubang langyaw. Maoy ilang komprahon ang mga nagkalain-laing klasi sa buwad nga isda ug nukos ug ubang produkto nga para gyud pasalubong. Gawas sa buwad naila usab ang Taboan sa pagpanghimo’g longganisa ug chorizo.      ([email protected]/0906-648-9637)