Tapus sa eleksyon ang LP mao gihapon ang party in power

Unsa man ang resulta sa umaabot nga eleksyon, mudaog ka o sa dili, Presidente gihapon si Noynoy, ug ang Liberal Party mao gihapon ang party in power. Mao ni ang naka-dilemma sa ato karong mga local executives … kun asa sila mopasilong sa sunod tuig nga eleksyon.

Dili kandidato si Noynoy, sa ato pa, makapatuyang siya sa buot niyang buhaton pagpalig-on ug pagpadaug sa Liberal Party… nga kun ikaw mag-oposisyon, subidahon kaayo ang imong pagkabutang tungod kay ang Presidente mismo ug ang party in power maoy imong kaatbang sa politika.

Mao nga sa paniid sa uban, mora na kono’g hayahay na karon ang kadaugan ni Jonjon Davide, gawas nga ang mo-support na kaniya ang Danao City. Walay problema si Agnes Magpale tungod kay hangtud karon, wala pay seguro kun duna bay muatbang niya.

Sa Cebu City, kinsa man kaha ang ideklarar nga city chairman sa LP? Kahinumdom ko sa nahitabo sa Cagayan de Oro, panahon ni Marcos, diin sila si Reuben Canoy ug Oloy Roa, giisip nga common candidate sa KBL, apan, sa diha nga nasuta ni Marcos kinsa ang dumadaug, si Reuben, ang gideklarar nga official candidate, a week before election day.

Nakadungog ko nga ang LP national directorate nagpa-survey kuno kun kinsay kusog sa Cebu City … ambot unsay resulta. Lagmit mao ni ang basihan kun kinsa ang paluyohan sa LP. Ang kang Vice President Binay nga UNA, unya pa sa 2016 mangusog paglihok, kaylagi, after the next year’s election, Presidente pa si Noynoy, ug ang LP mao gihapon ang party in power.

Sa ato pa, kun LP ka karon, daku ang bintaha. Ug sa pagsingabot unya sa 2016 election, ug magkakusog na ang UNA, pila ra may pagbalitok! Only in the Philippines.

Kahinumdom sad ko nga mga 40 years ago (daghan na ang wa pa matawo ining tuiga), dihay gipasaka sa Kongreso nga anti-turncoatism ug anti-dynasty bills … mora man og nabasura dayon to. Wa gani tingali to makaagi og debate sa committee level. Only in the Philippines.

Sa America, mauwaw kang mabalibali og partido. Sa ato pa, permanente kang Democrat o Republican, bahala na’g unsay partido sa sitting President. This will not happen in the Philippines. Ambut nganong sugot man lang pod tang duwaduwaan sa atong mga political leaders?

* * *

News item sa Philippines Star: “The Philippines is world’s No. 4 biggest remittance nation.” Unsay buot ipasabot ini? Is this something we can be proud of, or, something ikauwaw?

Akong sabut ini … ikaupat kita sa tibuok kalibutan (sunod lang ta sa India, China ug Mexico), nga gumikan sa atong kakabus, ug tungod kay dili kita makahatag og trabaho sa minilyong Pinoy, adto sila gawas sa nasud manimpalad. Ug tungod kay daghan na kaayong Pinoy ang nagpa-maid (aron di kaayo ikauwaw ilang ginganlan og domestic helper), ug tig-alima sa mga tigulang (ila sad ning ginganlan og caregiver kay medyo dungganan paminawon), natural, daku gyud ang remittances kay daghan man kaayo sila. Ang America ug Canada, duna bay mga overseas workers? Duna bay Singaporean o Malaysian nga nagpa-maid dinhi sa ato?

Ang maong mga Pinoy remittances giisip nga “lifeblood sa Philippine economy.” Sa ato pa, kun wa pa sila, dugay nang nabangkarota ang atong nasud. Salamat sa mga “modern heroes.” Maayo tingali nga mag-holiday sad ta pagsaulog sa Modern Heroes Day. By the way, ang total remittances sa atong mga modern heroes mikabat og 20.1 bilyones ka dolyar sa miaging tuig. Ngiga no?