Madagayaong kinabuhi

‘Lagda sa kalipay’

Ang manunulat ug “editor” nga si Norman Cousins nasakit og “spinal disorder” ug matud pa sa doctor nga usa ka porsiyento sa 500 ka kahigayonan nga siya maayo. Iyang nasayran nga ang gibati niya nagikan sa mga negatibong kahasol sa iyang kinabuhi. Tungod niini naghimo siya og paagi sa pag-alkontra sa iyang sakit. Nitataw siya og salida nga puno sa komedya nga nakapabahakhak niya. Sa maong paagi iyang namatngonan nga makatulog siya og 10 minutos. Ang reseta sa katawa nga niresulta og kalipay nakapaayo kaniya.

Sa atong pagmata human sa pag-ampo ug pasalamat sa Ginoo ato dayong sugdan ang positibong hunahuna nga andam ta sa mga hagit sa kinabuhi ug kaya nato buhaton ang mga gimbuhaton nga gihatag kanato.

Una natong buhaton mao ang pagbarog, ginhawa dayong pahiyom. Kung bation ka og tumang kakapoy mao gihapon ang buhaton.

Angay usab natong kuhaon ang mga kahadlok, pagduhaduha ug mga kahasol sa kinabuhi. Lakip na ang mga kasuko, kasina ug mga pagdumot ato kining pulihan sa mga maanindot nga kinaiya.

Ato usab likayan ang pakigsandurot sa tawo nga sa kanunay negatibo ang tan-aw sa kalibutan kay kini makadungag sa atong gibating kaguol. Ug ang labing importante ang pagpaduol sa Ginoo ang matuod nga tinubdan sa kalipay.