Unification despite politics!

Samtang adunay mga paningkamot nga mahiusa ang mga senior citizens, daku ang atong kabalaka nga gumikan sa politika, dili gayud nato makab-ot ang maong tinguha. Aduna nay mga tilimad-on nga magkabuwag gyud ang mga senior citizens, dili lamang dinhi sa dakbayan sa Sugbu, lagmit sa tanang dapit sa nasud. Kini, gumikan sa politika.

Subo kining palandungon. Ingonman, ang mga politiko, mora sad nga ilang gigamit ang pundok sa mga senior citizens, pagpa-advance sa ilang mga tinguha ug intereses… this early nga layo pa ang election. Lagmit, sa sunod tuig maklaro na gyud ang kasiak sa mga senior citizens, aduna nay dividing line tali sa mga dumadapig.

Again, subo kining palandungon tungod kay mao na unyay atong masaksihan ang panagbungol sulod sa pundok … ug atong ma-imagine ang ka-artificial unya sa pagtinagdanay sa isigka-senior citizen. Mawala na ang camaraderie.

Of course, adunay kagawasan ang tawo kinsay dapigan ug kinsay labanan. Apan, personal kini nga disisyon … dili unta dad-on ang kapunongan. Sa ato pa, Type O ka, ug ako, Rated R (Team Rama), apan amigo gihapon ta… ug walay labut ang tagsatagsa nato ka kapunongan.

Kun dunay mga kalihokan, mag-usa ta. Bisag kinsa nga pundok ang magpatawag og miting, ato kining tambongan … ug dili ilakip sa agenda ang politika, ug walay politiko nga tugotan nga mosulti ug mangampanya.

Apan, kun ugaling adunay pundok sa mga senior citizens nga mag-organize gyud alang sa politikanhong katuyoan … lain na ni nga istorya. Purely politics na gyud. Pagkakaron, adunay imaginary nga division tali sa duha ka pundok sa senior citizens. Nga kun magpatawag og tigum ang usa ka pundok, dili imbitahon, kun imbitahon man, dili motambong ang mga sakop sa laing pundok. This is bad.

Morag magkausa lang ta, magkit-anay panahon sa pagkobra sa cash assistance. Inighuman, mag-iyahay na. Mahimo nga magporma tag pundok, apan dili nato dad-on ang ngalan ug pundok sa mga senior citizens.

Akong usbon, individually, mag-atbang ta sa politika, kay di man mahitabo nga managsama ang atong labanan … apan, usa ra ta sa atong pagka-senior citizen. Kay kun atong tugotan nga maduhig sa politika ang atong pundok, mahitabo nga within the group, big or small, magkasungi ug maputol ang pagkahigalaay.

Unya, mabungkag na ang maayong relasyon sa isig-usa, labina kun ang presidente sa pundok, klaro kinsay gidapigan, ug mo-influence pa gyud sa iyang mga sakop pagnunot kaniya. Duna sad gani tay nadunggan nga kono, adunay pipila ka barangay captain nga dili buot nga masukwahi ang mga senior citizens sa paluyohan nilang politiko. 

Maoy atong panghinaut nga dili kita motugot nga gumikan sa politika, mabungkag kita. Alang nako, dili imposible ang unification. Kanang matang sa unification nga makapahiusa natong tanan … ug dili kanang maka-disunite na hinoon. Hagit kini sa mga presidente sa nagkalainlaing chapter sa atong mga barangay. Let’s get united, despite politics.