Talisay ug Sugbo tigtumod og shabu

Duha lang ang tinubdan sa shabu nga gipamaligya sa nagkalain-laing lungsod ug siyudad sa lalawigan sa Sugbo. Kini ang gipahibalo ni Police Superintendent Julian Entoma, Deputy Police Director for Operation sa kapolisan sa lalawigan sa Sugbo dihang siya ang nahimo namong bisita sa tulumanon “KRUSADA BATOK DRUGAS UG KORAPSYON” sa sibyaanan DySS Super Radyo Cebu nga inyong mabati matag alas 9:00 - 10:00 sa buntag sa matag adlaw nga Domingo.

Ang opisyal sa kapolisan sa lalawigan sa Sugbo miingon nga ang dakbayan sa Talisay mao ang tinubdan sa mga gipamaligyang nga ginadiling drugas sa south nga bahin sa lalawigan sa Sugbo samtang ang dakbayan sa Sugbo mao ang tinubdan sa mga ginadiling drugas nga gipamaligya sa norte nga bahin sa lalawigan sa Sugbo.

Bisan sa rehiyon 7 adunay mga lalawigan niini nga nagagikan sa dakbayan sa Sugbo ang ginadiling drugas nga gipamaligya sa ilang mga dapit. Kini basi sa gitug-an sa Philippine Drug Enforcement Agency o PDEA - 7.

Unsa mang pagkahitaboa nga nahimo mang tinubdan sa ginadiling drugas nga gipamaligya sa lalawigan sa Sugbo ug kasikbit nga mga lalawigan sa rehiyon 7 ang dakbayan sa Sugbo ug Talisay? Buot bang ipasabot niini nga nagmika ug nagyaka lang ang atong kapolisan sa suliran sa ginadiling drugas niining duha ka mga dakbayan o nausahan lang ba sila sa kautokan ug ka maro sa mga nagpayuhot sa ginadiling drugas?

Pero kun maghisgot ta og minaroay dili ba mas maro man ang atong mga polis? Ilabi na gyod ang polis sa Talamban? Dili ba imbestigahan man sa kadagkoan sa kapolisan sa dakbayan sa Sugbo ang mga polis sa Talamban tungod kay ilang gipalutaw nga ang nag adik-adik nga si Navarro nga ilang gigukod namatay kay nabuthan sa granada pero pag-autopsy namatay diay sa bala sa pistola nga mitama sa ulo sa biktima?