Lipat-Bahay

Lumipat ng bahay si Dadong Matinik

Dahil sa ang Diyos ay lubhang mabait;

Kaming mag-asawa ay Kanyang ninais

Na lumipat kami sa Lunsod ng Taguig!

Sa bagong tahanan kami ay kasama

Ng bunso kong anak at kanyang asawa;

May apat na anak, isa ay sanggol pa

Maligaya kami kahit matanda na!

Ang lupa ko’t bahay doon sa San Pedro

Ay nilisan muna’t titira na dito;

Sampaguita Village na lubhang mahal ko -

Laging dadalawin habang ako’y ako!

Sa Knights of Columbus at Senior Citizens

Ako’y ituring n’yo na kasapi pa rin;

Malayo man ako sa inyong paningin –

Sa puso ko’t diwa kayo’y tanging giliw!

Nang kami’y lumipat sa bagong tahanan

Si Mayor Cataquiz at ang kanyang ginang;

Pati si Aaron, anak nilang hirang

Sa paglipat-bahay kami’y tinulungan!

Ang hindi nagbago sa buhay ni Dadong –

Pagsulat ng tula sa P. Star NGAYON;

At sa PM, isa pang Star publication

Thank you kay Sir. Miguel at kanyang editors!

Ito’y pinaksa ko sa pitak na ito

Upang malaman lang ng mga barkada ko;

Ito’y pasalamat sa Diyos ng mundo’t

Isa sa maraming sa Kanya ay samo!

Sa gabi at araw ako’y nagdarasal

Di lang pansarili – pati na ang bayan;

Mga kapitbahay, mga kaibigan –

Kabilang sa hangad gumanda ang buhay!

At tulad ng ibang nasa media ngayon

Mga dinarasal panghabampanahon;

Ang mga nasawi dahil sa propesyon

Hustisya’y makamit ngayong term ni P-Noy!

Sapagka’t kung hindi’y kailan pa kaya

Mabibigyang wakas ang mga pagluha?

Ah, marami silang pinatay na bigla

Ni walang ataul nabaon sa lupa!