Kasagaran sa atong mga Sr. Citizen karon nagsalig nalang sa ilang gamay nga pension sa Social Security System kon SSS ug sa GSIS. Apan sukad nga gipaagi na sa bangko ang pagkuha sa ilang pension ang kasagaran nilang reklamo mao ang deduction sa service charge sa bangko. Busa kining suwat sa usa ka pensioner ang atong tubagon karon sa atong column.
* * *
Dear Atty. Divine,
Ako si Rogelio, 64 anyos nagpuyo sa Barangay Sangat, San Fernando Cebu. Ako misulat kanimo aron mangayo og tambag ug tabang. Nag-abang ra ko sa akong gipuy-an nga payag ug ako gani ang naggasto sa amakan, kawayan, kahoy ug uban pa. Ang akong abang P300 matag buwan. Ang ako gisaligan Atty. mao ra ang akong pension sa SSS nga P 1,200 matag buwan. Usahay kuhaan pa sa bangko og service charge ug kun dili kuno ko mag-withdraw pirmi sa akong pension ma-close ang akong account. Atty kanus-a man kutob ning akong pension? Pwede imo kong tabangan Atty. sa akong pension kanang way deduction? Miyembro ko sa Sr. Citizen apan wa may hinabang sa among lungsod. Naa bay sangay sa gobiyerno nga mamahimo tang mangayo og tabang? Dinhi nalang ko kutob hinaut imong tubagon ang akong suwat. — Matinahuron, Rogelio E. Sison
* * *
Dear Noy Rogelio,
Salamat sa imong pagsuway nga imo gyud intawon nga gihagoan sa paghatud sa Banat News.Kalabot sa imong pension sa SSS magpadayon na samtang buhi pa ta, mahunong lang ang atong pension kun wa na ta aning kalibutana. Kasabot ko nga kuwang ra gyud ang imong pension apan kining deduction sa service charge sa bangko mao gyud na ang ilang palisiya ug di na ta kausab niini. Ang maayo nimong buhaton, kausa ra ka mo-withdraw sa imong pension kada- buwan, ayaw pagbalik-balik og withdraw aron di ka magsige og bayad sa service charge. Pananglitan ang imong pension mogawas kada-petsa 30 sa buwan so mo-withdraw ka kada 30 ra sa buwan unya hutda na lang og kuha ang imong pension anang buwana aron di na ka magbalik-balik og sa sunod buwan na sab ka mobalik og withdraw.
Kalabot sab sa mga ahensya sa gobiyerno nga mamahimo nimong makatabang, suwayi og adto ang DSWD kay naa man na sila’y pantawid program kon 4 P’s aron pamasin nga maapil ka kay kapin sa usa ka libo matag-buwan man sab na ilang ipanghatag, so mamahimo nga mangutana ka sa DSWD unsaon sa pagpamiyembro anang pantawid program nila. Mag-ampo lang ta kanunay noy nga hatagan ta og maayong panglawas ug ayaw kalimot sa pagsimba kanunay kay di man ta pasagdan sa Ginoo. Hinaut nga nahatagan ka og katin-awan sa akong tubag. — Atty. Divine
* * *
Daghan sa atong mga Sr. Citizens nga susama niini og problema nga nagsalig lang sa ilang gamay nga pension ug kun sila masakit wa na gyud intawon silay ikapalit og mga tambal. Hinaut nga ang atong gobiyerno mohatag og prioridad paghatag og hinabang sa mga Sr. Citizens ug ang atong mga local nga kagamhanan mohatag sab og hinabang nga financial kanila sama sa gihimo sa ubang LGU’s kay dako kaayo kini og ikatabang kanila. Kun ang atong mga magbabalaod dunay mga health cards ug uban pa, mas maayo sab nga ilang iapil sa pagtabang ang mga Sr. Citizens bisan gamay lang nga financial assistance matag-buwan gikan sa ilang mga pork barrel.
Alang sa inyong pangutana, ipadala lang sa: LEGAL CORNER, Atty. Divine Marcial-Flores c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa flores_divina@yahoo.com