Unsa man ni?

Kung mamalit gani mo og bisan unsa diha sa mga department stores, pagbantay gayud. Tan-awa ang tag price sa inyong gipalit og itandi kun tukma ba ang presyo kun basahon na ang “bar code” sa produkto adto sa cashier. Biktima ko niini kaniadtong Huwebes sa gabii dihang nangompra ko sa Colonade Department Store. Usa sa akong mga pinalit mao kining gitawag nila og “CDO Tocino.”

Sa price tag gibutang didto nga P244.00 ang kantidad sa matag kilo. Apan dihang gipapresyohan na nako didto sa ilang electronic nga timbangan, nabutang didto nga ang kilo sa CDO Tocino mitubo na ngadto sa P244.50.

Gamay ra kaayo ang 50 sentimos nga maalkanse nimo, apan dili kana maoy isyu. Una, kun kana gihimo sa Colonade o sa ubang mga tindahan sa uban nila nga mga baligya, kadaku nato og alkanse no?

Sagad man nga dili na gayud ta magtan-aw. Wala ko’y tuyo nga magpa-refund apan ang wala nako magustohi kay makig-estorya unta ko sa supervisor sa meat section, mahadlok man moatubang.

Uy, kun mao na maayo pa nga mo-resign ka sa imong trabaho. Dili ka angay nga mag-supervisor kay dili ka man makamao nga mopasabot sa publiko kun adunay mangutana.

Ang uban usab nga kawani misuway apan sayop ang tubag. Gipangutana nako kun asa man ang mo-prevail kun adunay conflict sa presyo ang anaa ba sa price tag o kadtong anaa sa bar code.

Ang tubag niana, kadtong presyo nga gibutang sa tag maoy matuman. Palihug, management sa Colonade aksyoni kadtong kawani nimo nga maoy gitudlo nga supervisor pero dili makamao motubag kay dili man moduol og mopasabot.

* * *

Bisan og mius-os na ang kantidad sa mga petroleum products sama sa gasolina, krudo, gaas ug uban pa, apan angay gihapon nga tutokan sa atong mga opisyal sa kagamhanan ang paghisgot kabahin sa Oil Deregulation Law.

Husto kaayo si Valenzuela City Mayor Sherwin “Win” Gatchalian sa iyang pagsugyot nga ang atong mga opisyal sa kagamhanan dili angay nga matulog lang niini nga isyu. Isip vice president sa League of Cities of the Philippines, tukma ang gihimo ni Gatchalian nga giawhag niya ang mga kauban niya nga mga mayor sa lainlaing local government units nga mosalmot sa pagtuki niini.

Angay’ng daygon si Gatchalian niini kay nagpakabana siya sa maong isyu. Abi ninyo, ang presyo gud sa atong mga petroleum products gikontrolar man lang sa tulo ka dagkung fuel dealers.

Magsabot ra sila kun pila ang kantidad nga ilang gusto. Wala ba kamo makabantay? Ang Oil Deregulation Law gihimo lagi sa atong mga magbabalaud kaniadto sa pagtoo nga makapakunhod kini sa presyo sa petroleum products tungod sa kompetensya, apan dakung sayup.

Matud ni Gatchalian nga kita ra’ng mga tawo ang gibinuangan niining tulo ka dagkong oil dealers kay wala nay mahimo ang kagamhanan kay deregulated na ang maong produkto.

Maayo unta og ang kalidad ni Mayor Gatchalian manakod sa ubang mga opisyal sa kagamhanan aron nga sila maghugpong ug papason nila kining maong balaud, ang Oil Deregulation Law.

  Husto ang baruganan ni Win Gatchalian nga kinahanglan gayud unta nga ang kagamhanan manginlabot aron nga ang mga major oil dealers dili kay magpataka na lang og buot-buot kun pila ang presyo sa pagbaligya sa ilang produkto.

Kuyaw man kaayo nga karong pipila ka adlaw paspasan na usab sa mga major oil dealers ang pagpasaka sa presyo sa ilang mga baligya. Makasupak ba gud ang atong mga opisyal sa kagamhanan? Pikat.