Rebulto sa Kongreso

Kung pagkuha sa atensyon sa publiko ang tumong ni Kabataan Partylist Representative Raymond Palatino nagmalampuson ang wa' mailhing representante. Kung ang iyang tumong mao ang pagpa-ila sa katawhan nga adunay bansagon sa ubos balay balauranan, nagmalampuson siya. Kung ang iyang tinguha mao ang pag-ani og managlahing reaksyon gikan sa katawhan, iyang nakuha ang maong tumong. Kung ang pagsabong sa opinyon sa mga tawo ug mga nagkadaiyang sektor ang iyang tinguha, iya na ning nakab-ot.

Niani og managlahing reaksyon ang gidusong balaudnon ni Palatino nga idili ang pagpahigayon og santos nga misa sa publikong buhatan. Nalakip 'sab sa iyang balaudnon mao ang pagtang-tang sa mga rebulto sa mga santos nga gibutang sa mga publikong buhatan. Kung si Palatino ang pasultihon, adunay basehan ang iyang lakang tungod kay napatik sa konstitusyon nga kinahanglan nga patas ang pag-tratar sa tanang relihiyon diha sa mga publikong buhatan sa gobyerno. Adunay igong kapasikaran ang maong rason ni Palatino. Apan daghang anggulo sa iyang prinsipyo ang puno sa buslot.

Una, wa'y nagdili sa ubang relihiyon sa paghimo sa ilang mga naandan nga bulohaton diha sa ilang opisina basta di' lang ni makabalda sa ilang trabaho. Sama nga wa'y nagdili sa mga katoliko sa pagpahigayon og santos nga misa ug mga novena basta himuon lang ni dili oras sa ting-trabaho.  Buot ni Palatino nga tang-tangon ang mga santos o mga rebulto gikan sa mga publikong buhatan. Nakalimot siya nga wa'y nagpugong sa mga empleyado sa gobyerno sa pagbutang og ginoo sa ubang relihiyon-- ma Muslim man o Buddist ug uban pang tinuohan.

Basin nakalimot si Palatino nga mas una pang nahimugso ang kultura ug sibilisasyon sa usa ka dapit inay relihiyon. Dinhi sa Pilipinas, una pang-gihangop sa mga Pilipino ang atong pagtuo ug kultura itandi sa pagtukod og gobyerno. Halos kinyentos ka tuig na ang pagtuong Katoliko sa Pilipinas nga unang nahimugso dinhi sa Sugbo. Samtang ang gobyerno sa Pilipinas natukod human maangkon ang kaugalingnan niadtong 1898. Buot ipasabot, lawom na ang naukit nga marka sa kultura ug relihiyon itandi sa atong batakang balaod.

Sakto si Cebu Archbishop Emeritus Ricardo Cardinal Vidal sa iyang opinyon sa mao nga isyu. Matod sa Cardinal, dakong gubot ang mahitabo kung ihikaw, tandugon ug papason sa usa ka tawo ang kultura nga niukit na sa iyang pagkatawo. Ang gihimo ni Palatino usa ka lakang nga nitandog sa kultura sa mga Pilipino nga mas karaan pa sa gobyerno nga iyang gi-alagaran karon.   Sa usa ka nasud nga 85% sa populasyon Katoliko ug sa mga magbabalaod nga mayoriya Kristiyano, daghan ang nagtuo nga di' molampos ang way basehan nga tinguha sa maongg kongresista.

Kung ang pagtang-tang sa mga rebulto ang tumong sa Kabataan Partylist Representative, mao ba 'sab kaha ni ang baruganan sa mga kabatan-onan nga iyang gi-representahan? Mao ba 'sab kaha ni ang baruganan sa bag-ong henerasyon nga nihangop 'sab sa kultura ug tradisyon nga ilang gisunod gikan sa mga katiguwangan. Sa lakang nga gihimo ni Palatino, igo lang ning naka-ukay sa katawhan apan di' ni igo aron himuan siya og rebulto sa kongreso.

email: [email protected] or [email protected]